سندھ ہائی کورٹ نے معذور کوٹہ پر سیکنڈری اسکول ٹیچر کی بھرتی نہ کرنے کیخلاف درخواست پر انٹرویو کا ٹرانسکرپٹ طلب کرلیا

جمعرات 11 ستمبر 2025 18:01

کراچی (اُردو پوائنٹ اخبارتازہ ترین - این این آئی۔ 11 ستمبر2025ء) سندھ ہائی کورٹ نے معذور کوٹہ پر سیکنڈری اسکول ٹیچر کی بھرتی نہ کرنے کیخلاف درخواست پر انٹرویو کا ٹرانسکرپٹ طلب کرتے ہوئے سماعت 24 ستمبر تک ملتوی کردی۔سندھ ہائیکورٹ میں معذور کوٹہ پر سیکنڈری اسکول ٹیچر کی بھرتی نہ کرنے کیخلاف درخواست کی سماعت ہوئی۔ درخواستگزار کے وکیل عثمان فاروق ایڈووکیٹ نے موقف دیا کہ عدیل مجاہد نے ایس پی ایس سی کے تحریری امتحان میں کامیابی حاصل کی۔

درخواست گزار سمیت دیگر معذور افراد کو انٹرویو میں ناکام قرار دیدیا گیا ہے۔ معذور افراد کے لئے مختص 13 نشستوں پر 6 افراد کو میرٹ پر کامیاب قرار دیا گیا ہے۔ معذور افراد کی مختص نشستوں پر کسی معذور فرد کو کامیاب قرار نہیں دیا گیا۔

(جاری ہے)

سرکاری وکیل کے جواب جمع نہ کرانے پر عدالت برہم ہوگئی۔ جسٹس فیصل کمال عالم نے ریمارکس دیئے کہ جواب جمع کرانے کے لئے 2 بار مہلت دی جاچکی ہے پھر کیوں جواب جمع نہیں کرایا گیا۔

عدالت کو بتایا جائے انٹرویو میں کیا سوالات کئے گئے، کس بنیاد پر درخواستگزار کو ناکام قرار دیا گیا۔ آئندہ سماعت پر جواب داخل نہ کیا گیا تو چیئرمین ایس پی ایس سی ذاتی حیثیت میں پیش ہوں۔ عدالت نے سرکاری وکیل سے آئندہ سماعت تک انٹرویو کا ٹرانسکرپٹ طلب کرتے ہوئے سماعت 24 ستمبر تک ملتوی کردی۔