سیکرٹری پراونشل ٹرانسپورٹ اتھارٹی بلوچستان کی زیر نگرانی ٹریفک قوانین کی خلاف ورزی کرنے والوں کے خلاف کارروائیوں کا سلسلہ جاری

اتوار 14 ستمبر 2025 20:00

کوئٹہ (اُردو پوائنٹ اخبارتازہ ترین - اے پی پی۔ 14 ستمبر2025ء) سیکرٹری پراونشل ٹرانسپورٹ اتھارٹی (پی ٹی اے) بلوچستان وحید شریف عمرانی کی نگرانی میں صوبے بھر میں پبلک ٹرانسپورٹ، بین الصوبائی اور عبوری روٹ کی بسوں کے ساتھ ساتھ اوور لوڈنگ کرنے والے ٹرک، آئل ٹینکرز، کم عمر ڈرائیورز اور بغیر روٹ پرمٹ گاڑیوں کے خلاف کارروائیوں کا سلسلہ جاری ہے۔

اس سلسلے میں پی ٹی اے بلوچستان اور نیشنل ہائی وے اینڈ موٹروے پولیس (NHMP) نےکوئٹہ کے طور ناصر کراس کے مقام پر مجموعی طور پر 55 گاڑیوں کی چیکنگ کی گئی جن میں سے 12زیادہ بھری ہوئی ویگنیں /بسیں,05سرچ لائٹس جبکہ 6 بغیرفٹنس سرٹیفکیٹ اور 17روٹ پرمٹ کے بغیر چلنے والی اور 02چھت پر مسافر بٹھانے والی گاڑیوں کو ٹریفک قوانین کی خلاف ورزی کرنے پر موقع پر چالان کئے گئے۔

(جاری ہے)

اس موقع پر سیکرٹری پی ٹی اے بلوچستان وحید شریف عمرانی نے کہا کہ ٹریفک قوانین کی خلاف ورزی نہ صرف انسانی جانوں کو خطرے میں ڈالتی ہے بلکہ ٹرانسپورٹ کے شعبے میں بدانتظامی کو بھی بڑھاتی ہے۔ پی ٹی اے بلوچستان اور نیشنل ہائی وے اینڈ موٹروے پولیس مشترکہ طور پر ایسے عناصر کے خلاف بلاامتیاز کارروائی کر رہے ہیں، اوور لوڈنگ، کم عمر ڈرائیونگ، بغیر روٹ پرمٹ یا فٹنس سر ٹیفکیٹ کے گاڑی چلانے والوں کے لیے کوئی رعایت نہیں ہوگی۔