گندم کی اگیتی کاشت کےلئے کاشتکار ابھی سے زمین کی تیاری شروع کرد یں ،محکمہ زراعت

منگل 16 ستمبر 2025 16:39

فیصل آباد (اُردو پوائنٹ اخبارتازہ ترین - اے پی پی۔ 16 ستمبر2025ء) محکمہ زراعت نے کہا ہے کہ گندم کی اگیتی کاشت کےلئے کاشتکار ابھی سے زمین کی تیاری شروع کرد یں ، داب کے عمل کے ذریعے جڑ ی بوٹیاں ختم کرنے پر بھی خصوصی توجہ دی جائے تاکہ ربیع کی اچھی پیداورکاحصول یقینی ہو سکے۔نظامت زرعی اطلاعات محکمہ زراعت کی جانب سے کاشتکاروں کو آگاہ کیا گیا ہے کہ گندم کی بہتر پیداوار کے حصول کےلئے بروقت کاشت، شرح بیج اور آبپاشی کے ساتھ ساتھ زمین کی تیاری انتہائی اہمیت کی حامل ہوتی ہے۔

انہوں نے کہاکہ زرعی ماہرین کاشتکاروں کو تمام ممکن رہنمائی فراہم کررہے ہیں جبکہ بعض مقامات پر کسان میلے منعقد کرکے کاشتکاروں کو گندم کی کاشت کے بارے میں جدید زرعی سفارشات سے بھی آگاہ کیاجارہاہے۔

(جاری ہے)

انہوں نے کہا کہ جدید ٹیکنالوجی اور ماہرین زراعت کی سفارشات پر عمل کرکے کاشتکار بہتر پیداوار حاصل کر سکتے ہیں۔انہوں نے کاشتکاروں کو بہتر پیداوار حاصل کرنے کےلئے گندم سمیت ربیع کی دیگ ر فصلوں کا سیڈ کارپوریشن کا تصدیق شدہ بیج استعمال کرنے کی بھی ہدایت کی ۔

انہوں نے کہا کہ کاشتکار ترقی دادہ اقسام کا تصدیق شدہ بیج تمام شہروں میں قائم پنجاب سیڈ کارپوریشن کے ڈپوؤں اور ڈیلرز سے حاصل کریں کیونکہ کارپوریشن نے فصلات ربیع کابیج وافر مقدار میں فراہم کردیا ہے اور اس بیج کے استعمال سے بیماریوں سے پاک پیداوار کا حصول ممکن بنایاجاسکتاہے تاہم کاشتکار اچھی شہرت کی حامل پرائیویٹ سیڈ کمپنیوں کی طرف سے سپلائی کردہ بیج بھی استعمال کرسکتے ہیں۔

انہوں نے کہا کہ حکومت نے تمام شہروں میں سیڈ گریڈرز کی سہولیات مہیا کررکھی ہیں جہاں سے سیڈ گریڈنگ کے بعد بیج کو کاشت کیا جاسکتاہے۔ انہوں نے بتایاکہ 20نومبر تک گندم کی بوائی کیلئے بیج کی شرح 50کلو گرام فی ایکڑ اور 21 نومبر سے 15 دسمبر تک 60کلو گرام فی ایکڑ ہونی چاہیے۔ انہوں نے مزید بتایاکہ گندم کی اقسام چکوال 50، لاثانی 2008، آری2011، فیصل آباد 2008 وغیرہ زیادہ شگوفے بناتی ہیں اسلئے ان کی بروقت کاشت کی صورت میں مناسب وتر کے باعث بیج کی مقدار کو 5کلو گرام فی ایکڑ تک کم بھی کیاجا سکتاہے۔