جمشید دستی کی نااہلی کیس، اسپیکر کو جواب جمع کرانے کی مہلت

منگل 16 ستمبر 2025 22:38

ًلاہور (اُردو پوائنٹ اخبارتازہ ترین - آن لائن۔ 16 ستمبر2025ء) لاہور ہائیکورٹ میں سابق رکن قومی اسمبلی جمشید دستی کی نااہلی کے خلاف درخواست پر سماعت ہوئی۔ چیف جسٹس عالیہ نیلم کی سربراہی میں تین رکنی فل بینچ نے کیس کی سماعت کی، جس میں جسٹس حسن نواز مخدوم اور جسٹس خالد اسحاق بھی شامل تھے۔سماعت کے دوران جمشید دستی اپنے وکیل اشتیاق اے خان کے ہمراہ عدالت میں پیش ہوئے۔

چیف جسٹس عالیہ نیلم نے استفسار کیا کہ اسپیکر کی طرف سے کون پیش ہوا ہی اسپیکر کے وکیل نے عدالت سے مہلت مانگی اور مؤقف اختیار کیا کہ وکالت نامہ اور جواب جمع کرانے کے لیے مزید وقت درکار ہے کیونکہ نوٹس گزشتہ روز ہی موصول ہوا ہے۔چیف جسٹس عالیہ نیلم نے ریمارکس دیے کہ اس نظام کو معمولی نہ سمجھا جائے، عدالت نے اسی وجہ سے انتخابی عمل روکا ہے۔

(جاری ہے)

عوام کا یہ بنیادی حق ہے کہ وہ اپنے نمائندے کا انتخاب کریں۔ایڈیشنل اٹارنی جنرل نے عدالت کو بتایا کہ اٹارنی جنرل کا تحریری جواب جمع کرا دیا گیا ہے۔ تاہم جمشید دستی کے وکیل اشتیاق اے خان نے مؤقف اپنایا کہ مجھے اس جواب کی کاپی ابھی عدالت میں ملی ہے۔الیکشن کمیشن کے وکیل عمران عارف رانجھا نے بھی جواب جمع کرا دیا۔ فریقین کے دلائل سننے کے بعد عدالت نے اسپیکر قومی اسمبلی کے وکیل کو جواب جمع کرانے کے لیے مہلت دیتے ہوئے مزید سماعت ایک ہفتے کے لیے ملتوی کر دی۔