وزیراعلی بلوچستان کی ہدایت پر لسبیلہ کینال کی مرمت کا کام مکمل،حب شہرکیلئے پانی کی ترسیل بحال

منگل 16 ستمبر 2025 22:00

کوئٹہ (اُردو پوائنٹ اخبارتازہ ترین - اے پی پی۔ 16 ستمبر2025ء) وزیراعلی بلوچستان میر سرفرازبگٹی کی ہدایت پر لسبیلہ کینال کی مرمت کا کام مکمل کر کے حب شہر ،انڈسٹریل زون اور گڈانی کے عوام اور صنعتوں کیلئے پانی کی ترسیل بحال کر دی گئی۔ تفصیلات کے مطابق حب اور گردونواح میں حالیہ طوفانی بارشوں کے نتیجے میں لسبیلہ کینال کے مختلف 17 مقامات پر شگاف پڑنے کے باعث حب شہر، انڈسٹریل زون اور گڈانی میں پانی کی ترسیل معطل ہوگئی تھی، پانی کی بندش سے نہ صرف شہریوں کو مشکلات کا سامنا کرنا پڑا بلکہ صنعتی و تجارتی سرگرمیاں بھی متاثر ہوئیں، صورتحال کی سنگینی کو دیکھتے ہوئے وزیراعلیٰ بلوچستان میر سرفراز بگٹی نے فوری نوٹس لیتے ہوئے محکمہ آبپاشی سمیت متعلقہ اداروں کو ہنگامی اقدامات کی ہدایت کی تھی، وزیراعلیٰ کی ہدایت پر صوبائی وزیر آبپاشی میر صادق عمرانی اور صوبائی وزیر زراعت میر علی حسن زہری نے صورت حال پر قریبی نظر رکھی اور موقع پر رہنمائی فراہم کی۔

(جاری ہے)

ڈی جی پی ڈی ایم اے جہانزیب خان اور ایکسیئن ایریگیشن حب حسین احمد کی سربراہی میں محکمہ آبپاشی اور پی ڈی ایم اے کی ٹیموں نے دن رات محنت کر کے کینال کی مرمت مکمل کر لی جبکہ حب شہر، انڈسٹریل زون اور گڈانی کے عوام و صنعتوں کے لیے پانی کی ترسیل بھی بحال کردی گئی۔ عوام نے بروقت اقدامات پر صوبائی حکومت اور اداروں کا شکریہ ادا کیا ہے۔ضلعی انتظامیہ کے مطابق کینال کی مزید نگرانی کے لیے خصوصی ٹیمیں تعینات کردی گئی ہیں تاکہ دوبارہ کسی ہنگامی صورتحال سے بچا جا سکے۔