لیبیا، کشتی میں خوفناک آتشزدگی،50سوڈانی پناہ گزین ہلاک

حادثے کی وجہ کا تعین نہیں ہوسکا، تحقیقات کے لئے انکوائری کمیٹی تشکیل دیدی گئی

بدھ 17 ستمبر 2025 13:06

طرابلس(اُردو پوائنٹ اخبارتازہ ترین - این این آئی۔ 17 ستمبر2025ء)لیبیا کے ساحل کے قریب کشتی میں خوفناک آتشزدگی سے 50 سوڈانی پناہ گزین ہلاک ہوگئے جبکہ 24 کو زندہ بچا لیا گیا۔عالمی میڈیا کی رپورٹ کے مطابق یہ حادثہ اس مہلک راستے پر پیش آیا جسے افریقی ممالک سے تارکین وطن یورپ پہنچنے کے لئے استعمال کرتے ہیں، تاحال حادثے کی وجہ کا تعین نہیں ہوسکا، تحقیقات کے لئے انکوائری کمیٹی تشکیل دیدی گئی، ہلاک اور زخمی ہونے والوں میں خواتین اور بچے بھی شامل ہیں۔

(جاری ہے)

اقوام متحدہ کے ادارہ برائے مہاجرین نے واقعہ کی تصدیق کرتے ہوئے بتایا کہ زخمیوں کو طبی امداد دی جا رہی ہے تاہم ہلاکتوں میں اضافے کا خدشہ ہے، اقوام متحدہ کے ادارے نے ایک بیان میں کہا کہ ایسے سانحات کو روکنے کے لئے فوری اقدامات ناگزیر ہیں۔میڈیا رپورٹ میں بتایا گیا ہے کہ اعداد و شمار کے مطابق صرف گزشتہ سال بحیرہ روم میں 2,452 افراد ہلاک یا لاپتہ ہوئے جس سے یہ دنیا کا سب سے خطرناک سمندری راستہ قرار دیا جاتا ہے، اگست میں اٹلی کے جزیرے لامپیدوسا کے قریب دو کشتیوں کے ڈوبنے سے کم از کم 27 افراد ہلاک ہوئے تھے۔