وفاقی وزیرداخلہ کی تربت آمد، شہداء کو خراج عقیدت، نمازِ جنازہ میں شرکت

بدھ 17 ستمبر 2025 23:14

تربت (اُردو پوائنٹ اخبارتازہ ترین - آن لائن۔ 17 ستمبر2025ء) وفاقی وزیرداخلہ محسن نقوی نے فرنٹیئر کور ساوتھ کے ہیڈ کوارٹر تربت کا دورہ کیا جہاں انہوں نے آئی جی ایف سی ساوتھ میجر جنرل بلال سرفراز خان کے ہمراہ ضلع کیچ میں شہید ہونے والے کیپٹن وقار احمد اور چار جوانوں کی نمازِ جنازہ میں شرکت کی۔ شہداء میں کیپٹن وقار احمد، نائیک عصمت اللہ، لانس نائیک جنید احمد، لانس نائیک خان محمد، اور سپاہی محمد ظہور شامل تھے۔

وزیرداخلہ اور آئی جی ایف سی ساوتھ نے شہداء کے جسد خاکی کو کندھا دیا اور ان کی بلندی درجات کے لیے دعا کی۔محسن نقوی نے کہا کہ کیپٹن وقار احمد اور ان کے ساتھیوں نے فرض کی راہ میں جانیں قربان کرکے عظیم مثال قائم کی ہے۔ قوم ان لازوال قربانیوں کو کبھی فراموش نہیں کر سکتی۔

(جاری ہے)

انہوں نے کہا کہ شہداء کے خاندان ہمارے اپنے خاندان ہیں اور پوری قوم ہمیشہ ان کی مقروض رہے گی۔

انہوں نے شہداء اور ان کے خاندانوں کو سلام پیش کرتے ہوئے کہا کہ ان کی قربانیاں رائیگاں نہیں جائیں گی۔اس موقع پر میجر جنرل بلال سرفراز خان نے کہا کہ سکیورٹی فورسز کی قربانیاں دہشت گردی کے خلاف ہمارے غیر متزلزل عزم کا ثبوت ہیں۔ نماز جنازہ میں اعلیٰ عسکری و سول حکام نے شرکت کی اور شہداء کو پورے فوجی اعزاز کے ساتھ خراج عقیدت پیش کیا گیا۔