’لازوال عشق‘ ڈیٹنگ شو نہیں، عائشہ عمر نے سوشل میڈیا صارفین کی تنقید کا جواب دے دیا

لاہور ( اُردو پوائنٹ اخبارتازہ ترین۔ 18 ستمبر 2025ء ) معروف اداکارہ، ماڈل اور ٹی وی شو ہوسٹ عائشہ عمر نے ریئلٹی شو ’لازوال عشق‘ کو ڈیٹنگ شو قرار دینے والی خبروں کی سختی سے تردید کردی۔ ڈیجیٹل میڈیا پلیٹ فارم دی کرنٹ کو ایک انٹرویو میں انہوں نے کہا کہ سوشل میڈیا پر پھیلنے والی تنقید اور شو کے حوالے سے ہونے والے منفی تبصروں کی اصل وجہ غلط فہمیاں ہیں جنہیں بعض میڈیا پلیٹ فارمز نے بڑھا چڑھا کر پیش کیا، پرومو پر مختلف قسم کے تبصرے اور قیاس آرائیاں سامنے آرہی ہیں کہ میں نے اسے پاکستانی ڈیٹنگ شو کہا ہے لیکن ایسا ہرگز نہیں، میں نے کبھی اس کو ڈیٹنگ شونہیں کہا۔

عائشہ عمر کا کہنا ہے کہ اس شو کا تعلق کسی مغربی ڈیٹنگ شو جیسے لو آئی لینڈ کے فارمیٹ سے نہیں ہے، یہ ایک ترک شو ہے جسے اردو زبان میں اور پاکستانی ناظرین کے لیے تیار کیا گیا ہے، یہ ایسا پلیٹ فارم ہے جہاں نوجوان ایک دوسرے کو بہتر طور پر جان کر زندگی کا ہم سفر ڈھونڈ سکیں گے، شو میں حصہ لینے والے نوجوان ایک پرتعیش ولا میں رہیں گے لیکن تمام انتظامات پاکستانی معاشرتی اور ثقافتی اقدار کو مدِنظر رکھ کر کیے گئے ہیں۔

(جاری ہے)

ان کا مؤقف ہے کہ ماضی میں بھی پاکستان میں ایسے شوز پیش کیے جا چکے ہیں لازوال عشق بھی محض ایک سوشل ایکسپیرمنٹ کے طور پر پیش کیا جا رہا ہے جو باہمی گفتگو پر مبنی ہوگا، جس میں نوجوان ایک ہی جگہ رہتے ہیں لیکن رہائش کے الگ انتظامات ہوتے ہیں جہاں لڑکیوں اور لڑکوں کے لیے علیحدہ فلورز اور الگ کمرے ہوں گے، صرف لاؤنج، کچن اور پول سائیڈ مشترکہ ہوں گے جہاں وہ ایک دوسرے سے گفتگو کر سکیں گے۔

عائشہ عمر نے بتایا کہ لازوال عشق ترکی میں فلمایا گیا ہے اس کی تقریباً 100 اقساط ہوں گی، اس شو میں نہ تو کوئی پہلے سے بنائے گئے جوڑے شامل ہیں اور نہ ہی ان پر کسی پر رشتہ قائم کرنے کے لیے دباؤ ہوگا، شو میں چار مرد اور چار خواتین شامل ہیں جو ایک ولا میں رہتے ہوئے مختلف چیلنجز، گیمز، جذباتی اتار چڑھاؤ اور تنازعات کا سامنا کریں گے، ان کے نتیجے میں بھی تعلق بنے گا وہ ایک دوسرے کو جاننے اور باہمی بات چیت کے بعد ہی بنے گا یہاں کھیل بھی گفتگو اور کمیونیکیشن پر مبنی کھیلے جائیں گے اور اختتام پر ایک وننگ کپل منتخب کیا جائے گا۔