جعلی فٹبال ٹیم، انسانی سمگلر کے بڑے انکشاف سامنے آ گئے

ملزم 2024ء میں بھی ٹیم بنا کر17 لڑکوں کو بھیج چکا، جو واپس نہیں آئے : ڈائریکٹر ایف آئی اے

ذیشان مہتاب جمعرات 18 ستمبر 2025 11:48

جعلی فٹبال ٹیم، انسانی سمگلر کے بڑے انکشاف سامنے آ گئے

لاہور (اردو پوائنٹ تازہ ترین اخبار ۔ 18 ستمبر 2025ء ) جعلی فٹبال فیڈریشن اوروزارت خارجہ کے جعلی این او سی بنا کر فٹبال ٹیم کو جاپان بھیجنے والے ملزم وقاص بارے بڑے انکشافات سامنے آئے ہیں۔

جاپان سے ڈیپورٹ ہونے والے 22 افراد جب ایئرپورٹ پہ اترے توان سے پوچھ گچھ کی گئی جنہوں نے ملزم وقاص سے متعلق بتایا کہ اس نے انھیں جاپان کے ویزے لگوانے کے 45 لاکھ فی کس لیے تھے۔

(جاری ہے)

اس حوالے سے ڈائریکٹر زون محمد بن اشرف نے ’ایکسپریس نیوز‘ سے خصوصی گفتگو میں بتایا کہ ملزم وقاص نے ایک جعلی فٹبال فیڈریشن بنائی پھرجعل سازی سے وزارت خارجہ کا این او سی بنایا اور 22 افراد جن کا دور دورتک فٹبال کھیلنے سے تعلق نہ تھا، ان کو ٹریننگ دلائی ، وردیاں کٹس پہنائیں اورایمبیسی سے ویزے لگوا لیے۔

ڈائریکٹر کا کہنا تھا کہ ویزے تو ٹھیک لگ گئے تھے لیکن اس کے پیچھے جوعمل تھا وہ جعل سازی پہ مبنی تھا، اس لیے ملزم وقاص علی کو سیالکوٹ سے گرفتار کیا گیا ہے۔

دوران تفتیشن انکشاف ہوا ہے کہ ملزم 2024ء میں بھی ایسے ہی ٹیم بنا کر 17 لڑکوں کو بھیج چکا ہے جو کہ واپس نہیں آئے۔

ڈائریکٹر زون محمد بن اشرف کا کہنا ہے کہ یہ کام وقاص علی اکیلے کا نہیں ہوسکتا پورا گینگ پکڑیں گے۔