پنجاب پولیس کے اپنے ہونہار ملازمین کی اعلی تعلیم اور استعداد کار میں اضافے کے لئے اقدامات جاری

نجی یونیورسٹی نے پنجاب پولیس کے 91 پولیس افسران و اہلکاروں کے لیے 5 کروڑ روپے کے سکالرشپس فراہم کیے

منگل 23 ستمبر 2025 19:20

لاہور(اُردو پوائنٹ اخبارتازہ ترین - این این آئی۔ 23 ستمبر2025ء)پنجاب پولیس کے اپنے ہونہار ملازمین کی اعلی تعلیم اور استعداد کار میں اضافے کے لئے اقدامات جاری ہیں جس کے تسلسل میں نجی یونیورسٹی) یو ایم ٹی) نے پنجاب پولیس کے ساتھ کیے گئے معاہدے کے تحت 91 پولیس افسران و اہلکاروں کے لیے 5 کروڑ روپے کے سکالرشپس فراہم کیے ہیں۔آئی جی پنجاب ڈاکٹر عثمان انور نے اس اقدام پر اظہارِ تشکر کرتے ہوئے کہا کہ یونیورسٹی آف مینجمنٹ اینڈ ٹیکنالوجی کی جانب سے کثیر سکالرشپس کی فراہمی پنجاب پولیس کے لیے ایک شاندار موقع ہے۔

انہوں نے کہا کہ پولیس افسران و اہلکار جدید علوم جیسے ماڈرن پولیسنگ، آرٹیفیشل انٹیلیجنس، سکیورٹی اینڈ اسٹریٹجک اسٹڈیز اور انفارمیشن ٹیکنالوجی میں تعلیم حاصل کر رہے ہیں، جس سے ان کی پیشہ ورانہ صلاحیتوں میں نمایاں اضافہ ہوا ہے۔

(جاری ہے)

آئی جی پنجاب نے مزید کہا کہ پولیس شہداء، ریٹائرڈ اور حاضر سروس ملازمین کے بچوں کی اعلیٰ تعلیم کے لیے بھی پنجاب پولیس نے 13 نامور تعلیمی اداروں کے ساتھ ایم او یوز سائن کیے ہیں۔

ترجمان پنجاب پولیس نے بتایا کہ پولیس افسران اور اہلکاروں کی اعلیٰ تعلیم کے اخراجات میں پنجاب پولیس اور یونیورسٹی کے درمیان کیے گئے ایم او یو کے تحت، پولیس افسران صرف 10 فیصد خرچ برداشت کر رہے ہیں جبکہ یونیورسٹی 90 فیصد اسکالرشپ فراہم کر رہی ہے۔ترجمان نے مزید بتایا کہ اس وقت نجی یونیورسٹی میں 24 کانسٹیبلز، 18 پولیس کمیونیکیشن آفیسرز، 11 سینئر اسٹیشن اسسٹنٹس، 9 پولیس ٹیکنیکل آفیسرز، 5 سب انسپکٹرز اور 5 ڈیٹا انٹری/وائرلیس آپریٹرز زیر تعلیم ہیں۔

اسی طرح 4 ڈپٹی ایگزیکٹو آفیسر سیف سٹیز، 4 سینئر کمیونیکیشن آفیسرز، 3 ہائی وے پٹرول پولیس اہلکار، 3 پولیس ٹیکنیکل آفیسرز، 2 ٹریفک وارڈنز، ایک سینئر ٹیلی کمیونیکیشن آفیسر اور ایک آفس سپرنٹنڈنٹ بھی اس پروگرام کے تحت تعلیم حاصل کر رہے ہیں۔آئی جی پنجاب ڈاکٹر عثمان انور نے کہا کہ نجی یونیورسٹی کے تعاون سے پولیس فورس کے افسران و اہلکاروں کی استعداد کار میں شاندار اضافہ ہوا ہے، جو کہ مستقبل میں پولیس کی کارکردگی اور عوامی خدمت میں مزید بہتری کا باعث بنے گا۔