صحافیوں کو ہراساں نہ کریں ،بانی پی ٹی آئی فوری طور پر سینئر صحافی اعجاز احمد سے معذرت کریں ، صدر این پی سی

پیر 29 ستمبر 2025 22:30

اسلام آباد (اُردو پوائنٹ اخبارتازہ ترین - اے پی پی۔ 29 ستمبر2025ء) نیشنل پریس کلب(این پی سی) اسلام آباد کے صدر اظہر جتوئی، قائم مقام صدر احتشام الحق،سیکرٹری نیئر علی اور فنانس سیکرٹری وقار عباسی نے سینئر صحافی اعجاز احمد کے خلاف پی ٹی آئی کے بانی کے نامناسب رویہ اور کارکنان کی جانب سے دی جانے والے دھمکیوں کی شدید مذمت کی ہے۔پیر کو جاری مذمتی بیان میں این پی سی کی منتخب قیادت نے اس واقعہ کو آزادی اظہار رائے پر حملہ قرار دیتے ہوئے کہا کہ ایک صحافی کی رائے یا رپورٹنگ سے اختلاف کا یہ مطلب ہرگز نہیں کہ سیاسی قیادت یا ان کے کارکنان اخلاقی حدود پار کرتے ہوئےمیڈیا کو نشانہ بنانا شروع کر دیں۔

این پی سی کی قیادت نےمطالبہ کیا کہ بانی پی ٹی آئی فوری طور پر سینئر صحافی اعجاز احمد سے معذرت کریں اورپی ٹی آئی قیادت اپنے کارکنان کو واضح ہدایات دے کہ وہ صحافیوں کو ہراساں نہ کریں اورایسی مہمات سے خود کو الگ کریں ورنہ نتائج کی تمام تر ذمہ داری خود ان پر اوپر عائد ہو گی۔

(جاری ہے)

این پی سی کی قیادت نے واضح کیا کہ اگر معذرت نہ کی گئی اور ہراسانی کا سلسلہ بند نہ ہوا توپی ٹی آئی کی تمام پریس کانفرنسز سے واک آؤٹ، بائیکاٹ اور دیگر احتجاجی اقدامات کئے جائیں گے۔ صحافی برادری اپنی آزادی، عزت اور وقار پر کوئی سمجھوتہ نہیں کرے گی۔