حکومت گندم کی مارکیٹ میں دستیابی اور استحکام یقینی بنانے کیلئے پرعزم ہے ، وزیر اعلی سندھ

منگل 30 ستمبر 2025 23:10

کراچی (اُردو پوائنٹ اخبارتازہ ترین - اے پی پی۔ 30 ستمبر2025ء) وزیر اعلی سندھ سید مراد علی شاہ نے گندم کے اجرا ء کی پالیسی سے متعلق وزیر اعلی ہائوس میں منعقد ہ اجلاس کی صدارت کرتے ہوئے کہاہے کہ ان کی حکومت گندم کی مارکیٹ میں دستیابی اور استحکام یقینی بنانے کیلئے پرعزم ہے تاکہ آٹے اور روٹی کی قیمتیں مستحکم رہیں۔منگل کو وزیر اعلی ہائوس سے جاری اعلامیہ کے مطابق اجلاس میں وزیرِزراعت محمد بخش مہر، وزیر خوراک مخدوم محبوب الزمان، چیف سیکریٹری آصف حیدر شاہ، پرنسپل سیکریٹری آغا واصف، سندھ ریونیو بورڈ کے چیئرمین واصف میمن، سیکریٹری زراعت زمان ناریجو، سیکریٹری خوراک بچل راہپوٹو، اسپیشل سیکریٹری خزانہ اصغر میمن اور دیگر افسران نے شرکت کی۔

وزیراعلی سندھ سید مراد علی شاہ نے کہا کہ اس وقت سندھ میں 12لاکھ ٹن گندم کے ذخائر موجود ہیں جبکہ نجی شعبے کے پاس بھی مزید 6 لاکھ ٹن گندم موجود ہے۔

(جاری ہے)

وزیرِخوراک مخدوم محبوب کے مطابق یہ ذخائر ساڑھے چار ماہ تک کے لیے کافی ہیں جس کے بعد نئی فصل مارکیٹ میں آجائے گی۔وزیراعلی سندھ نے وزیرِخوراک کو ہدایت دی کہ گندم اجراء پالیسی تیار کرکے منظوری کے لیے پیش کریں۔

انہوں نے کہا کہ میں چاہتا ہوں کہ اسی ہفتے گندم اجراء پالیسی کو حتمی شکل دے کر قیمت مقرر کی جائے۔وزیرِخوراک مخدوم محبوب نے اجلاس کو بتایا کہ معمول کے مطابق ہر ماہ تقریبا 2 لاکھ 50 ہزار ٹن گندم مارکیٹ میں جاتی ہے۔وزیراعلی نے کہا کہ پیداوار بڑھانے کے لیے حکومت 25 ایکڑ یا اس سے کم زمین رکھنے والے کسانوں کو سہولت فراہم کر رہی ہے۔ انہوں نے کہا کہ ہم ایسے کاشتکاروں کو ایک بوری ڈی اے پی اور دو بوری یوریا کھاد فراہم کر رہے ہیں۔ انہوں نے مزید کہا کہ میں گندم کی سپورٹ پرائس مقرر کرنا چاہتا ہوں تاکہ بہتر فصل کو یقینی بنایا جا سکے۔

Facebook Twitter Google + Share on Whatsapp

حکومت گندم کی مارکیٹ میں دستیابی اور استحکام یقینی بنانے کیلئے پرعزم ہے ، وزیر اعلی سندھ

متعلقہ عنوان :

مزید قومی خبریں