امریکا، حکومتی فنڈنگ بل منظور نہ ہوسکا، شٹ ڈاون کا خدشہ بڑھ گیا

امریکا کے ایوان نمائندگان اور سینیٹ دونوں ہی پر صدر ٹرمپ کی جماعت ری پبلکنز کا کنٹرول ہے،رپورٹ

بدھ 1 اکتوبر 2025 14:05

نیویارک (اُردو پوائنٹ اخبارتازہ ترین - این این آئی۔ 01 اکتوبر2025ء)حکومتی فنڈنگ سے متعلق بل امریکی سینیٹ سے منظور نہ کرایا جاسکا جس کی وجہ سے امریکا میں شٹ ڈاون کا خدشہ بڑھ گیا۔امریکا کے ایوان نمائندگان اور سینیٹ دونوں ہی پر صدر ٹرمپ کی جماعت ری پبلکنز کا کنٹرول ہے مگر سو رکنی سینیٹ میں بل منظور کرانے کیلئے اسے ساٹھ ووٹ درکار ہیں جبکہ حکمراں جماعت کے پاس صرف تریپن ووٹ ہیں۔

ڈیموکریٹک بل سینیٹ پہلے ہی مسترد کرچکی ہے جس کی حمایت میں سنتالیس اور مخالفت میں تریپن ووٹ پڑے تھے۔

(جاری ہے)

اس کے بعد ری پبلکنز کی جانب سے پیش بل پر ووٹنگ ہوئی مگر پانچ ووٹوں کی کمی کے سبب یہ بل بھی مسترد کردیا گیا۔ رینڈ پال واحد ری پبلکن ہیں جنہوں نے اپنی پارٹی کے بل کیخلاف ووٹ دیا۔ واضح رہے کہ امریکا میں نیا مالی سال یکم اکتوبر سے شروع ہوتا ہے اور اس بار یہ بغیر بجٹ منظوری کے شروع ہونے کا خدشہ ہے۔ اگر کیپٹل ہل مخصوص مدت کیلئے حکومتی فنڈنگ سے متعلق عارضی بل بھی منظور نہ کرسکی تو وفاقی ایجنسیز کے شٹ ڈاون کرنا پڑیں گی۔ امریکا میں اس سے پہلے سب سے طویل شٹ ڈاون پینتیس روز تک جاری رہ چکا ہے اور یہ ڈونلڈ ٹرمپ کے پہلے دور صدارت میں ہوا تھا۔