مساجدوعبادت گاہوں کی شمسی توانائی پر منتقلی فلیگ شپ منصوبہ ہے، معاون خصوصی برائےتوانائی طارق سدوزئی

بدھ 1 اکتوبر 2025 19:40

پشاور (اُردو پوائنٹ اخبارتازہ ترین - اے پی پی۔ 01 اکتوبر2025ء) وزیراعلیٰ خیبرپختونخوا کے معاونِ خصوصی برائے توانائی انجینئر طارق سدوزئی نے کہا ہے کہ صوبے میں مساجد و عبادت گاہوں کی شمسی توانائی پر منتقلی صوبائی حکومت کا فلیگ شپ منصوبہ ہے جسے جلد از جلد پایہ تکمیل تک پہنچایا جائےگاتاکہ عوام اس کے ثمرات سے بھرپور استفادہ کرسکیں۔ان خیالات کا اظہار انہوں نےضلع کوہاٹ اور ڈیرہ اسماعیل خان کے دورے کے موقع پر مختلف مساجد اورعبادت گاہوں میں محکمہ پیڈوکی جانب سے شمسی توانائی پرمنتقلی کے جاری منصوبوں کاجائزہ لیتے ہوئے کیا۔

اس موقع پر انکے ہمراہ پراجیکٹ ڈائریکٹر سولرائزیشن اسفندیار خان، پیڈو کی ریجنل منیجر (جنوب) انجینئر ثنا وحید سمیت متعلقہ افسران بھی موجود تھے۔

(جاری ہے)

معاون خصوصی انجینئر طارق سدوزئی نے ضلع کوہاٹ میں شمسی توانائی پرمنتقل کی گئی مساجد میں نصب شمسی توانائی کے آلات اورکام کابغورجائزہ لیا اوراطمینان کا اظہارکرتے ہوئے پراجیکٹ حکام کو باقی ماندہ کام ایک ماہ کے اندرہرصورت مکمل کرنے کی ہدایات جاری کیں۔

انہوں نے پیڈو حکام کوشمسی توانائی کے منصوبوں کی مانیٹرنگ تیزکرنے کے احکامات بھی دیئے۔ اس دوران وہ مقامی افراد سے ملے اور ان سے منصوبے کے ثمرات کے حوالے سے ان کی آراء حاصل کیں۔ اس موقع پر متعلقہ افسران نے انہیں سولرائزیشن منصوبے کے تحت مذکورہ اضلاع میں منصوبے پر جاری پیش رفت پر تفصیلی بریفنگ دی۔انہوں نے افسران کو ہدایت کی کہ منصوبے کی بروقت تکمیل اور معیاری آلات کی تنصیب کو ہر صورت یقینی بنایا جائے تاکہ حکومت کے اس اہم فلیگ شپ منصوبے سے زیادہ سے زیادہ لوگ مستفید ہوسکیں۔معاون خصوصی طارق سدوزئی نے مزید بتایا کہ پیڈو کے تحت سکولوں اور دیگر سرکاری عمارتوں کو بھی شمسی توانائی پر منتقل کرنے کے لئے عملی اقدامات جاری ہیں۔