مانسہرہ پولیس نے ناران میں راستہ بھٹکنے والی جرمن خاتون سیاح کو 6 گھنٹوں میں ریسکیو کر لیا

جمعرات 2 اکتوبر 2025 13:43

ایبٹ آباد (اُردو پوائنٹ اخبارتازہ ترین - اے پی پی۔ 02 اکتوبر2025ء) مانسہرہ پولیس نے ناران میں راستہ بھٹکنے والی جرمن خاتون سیاح کو 6 گھنٹوں کی انتھک محنت کے بعد باحفاظت ریسکیو کر لیا۔ مانسہرہ پولیس کے مطابق 7 رکنی جرمن سیاحوں کا ایک گروپ ناران پہنچا۔ رات گئے اطلاع ملی کہ گروپ کی 66 سالہ خاتون سیاح کارون این ملارک ہائیک پر جانے کے بعد ہوٹل واپسی کے دوران راستہ بھٹک گئی ہیں۔

ڈی پی او مانسہرہ شفیع اللہ گنڈا پور کی خصوصی ہدایات پر ناران پولیس نے فوری طور پر سرچ آپریشن شروع کیا اور دو ٹیمیں تشکیل دے کر مختلف راستوں پر روانہ کیں۔

(جاری ہے)

تقریباً 6 گھنٹوں کی انتھک محنت اور بھرپور سرچ آپریشن کے بعد خاتون سیاح کو بحفاظت تلاش کر لیا گیا اور انہیں واپس ہوٹل پہنچا دیا گیا۔ ڈی پی او مانسہرہ شفیع اللہ گنڈا پور نے اس موقع پر کہا کہ سیاح ہمارے اثاثہ ہیں، مانسہرہ پولیس ملکی و غیر ملکی سیاحوں کی خدمت اور سکیورٹی کے لیے ہر وقت تیار ہے۔

انہوں نے کہا کہ جنت نظیر وادی ناران آنے والے تمام مہمانوں کو خوش آمدید کہتے ہیں اور ان کو پرامن ماحول فراہم کرنا ہماری اولین ترجیح ہے۔ ڈی آئی جی ہزارہ ناصر محمود ستی نے ریسکیو آپریشن میں حصہ لینے والی تمام ٹیموں کو شاباش دی اور ان کی کاوشوں کو بھرپور سراہا۔