اسلامک سولیڈیریٹی گیمز ریاض 2025 کا عنوان ’’ایک امت‘‘ ہوگا، آرگنائزنگ کمیٹی

اتوار 5 اکتوبر 2025 10:30

ریاض (اُردو پوائنٹ اخبارتازہ ترین - اے پی پی۔ 05 اکتوبر2025ء) سعودی عرب میں آئندہ ماہ منعقد ہونے والی اسلامک سولیڈیریٹی گیمز ریاض 2025 کی آرگنائزنگ کمیٹی نے اعلان کیا ہے کہ گیمز کے چھٹے ایڈیشن کا عنوان ’’ایک امت‘‘ ہوگا جو اسلامی دنیا کے عوام کے اتحاد اور کھیلوں کے ذریعے یکجہتی و ہم آہنگی کی اقدار کو اجاگر کرتا ہے۔اردو نیوز کے مطابق اسلامک سولیڈیریٹی گیمز ریاض 2025 کی افتتاحی تقریب 7 نومبر کو ہوگی اور 21 نومبر کو اختتامی تقریب کے ساتھ مقابلے مکمل ہوں گے۔

اس میں 57 ممالک کے 3000 سے زائد کھلاڑی شریک ہوں گے۔مقابلے 23 کھیلوں پر مشتمل ہوں گے جن میں دو کھیل معذور افراد کے لیے مخصوص ہیں۔یہ ایونٹ پانچ بڑے مقامات پر منعقد ہوگا جن میں شہزادہ فیصل بن فہد اسپورٹس سٹی، شہزادہ فیصل بن فہد اولمپک کمپلیکس، بولیوارڈ ریاض سٹی، الجنادریہ، اور المسار الریاضی شامل ہیں۔

(جاری ہے)

اس بار ایتھلیٹکس، تیراکی، تائیکوانڈو، جودو، کراٹے، 3×3 باسکٹ بال، باکسنگ، گھڑ سواری، جو جِتسو، ویٹ لفٹنگ، ہینڈ بال، ٹیبل ٹینس کے ساتھ پہلی مرتبہ اونٹ دوڑ اور ای اسپورٹس کو بھی کھیلوں کی فہرست میں شامل کیا گیا ہے،یہ ایونٹ اس حوالے سے بھی منفرد ہے کہ اس میں پہلی بار ’’ویلیج آف ایتھلیٹس‘‘ Village قائم کیا گیا ہے ،یہ مملکت میں اپنی نوعیت کی پہلی سہولت ہے جس میں 1200 کے قریب کمرے موجود ہیں، طبی، انتظامی اور سروسز کی سہولیات بھی فراہم کی گئی ہیں۔

کیمپ میں ایک مکمل ٹریننگ سینٹر بھی قائم کیا گیا ہے جو مملکت کے اس عزم کی عکاسی کرتا ہے کہ وہ کھلاڑیوں اور مہمانوں کو ایک غیر معمولی ماحول فراہم کرے گاتاکہ تنظیم اور میزبانی کے لحاظ سے ایک عالمی معیار کا اسپورٹس ماڈل پیش کیا جاسکے۔