امیتابھ بچن دوران شو آنجہانی والدہ کی آڈیو سن کر آبدیدہ ہوگئے، ویڈیو وائرل

جمعرات 9 اکتوبر 2025 16:57

ممبئی (اُردو پوائنٹ اخبارتازہ ترین - این این آئی۔ 09 اکتوبر2025ء) بالی وڈ شہنشاہ امیتابھ بچن کون بنے گا کروڑ پتی سیزن 17 کے شوکے دوران اپنی والدہ تیجی بچن کی آواز سن کر آبدیدہ ہوگئے جس کی ویڈیو سوشل میڈیا پر وائرل ہوگئی۔ بھارتی میڈیا کے مطابق بالی وڈ بگ بی امیتابھ بچن کی 83 ویں سالگرہ کے موقع پر ٹی وی شو کون بنے گا کروڑ پتی کا خاص ایپی سوڈ 11 اکتوبر کو نشر کیا جائے گا۔

اس موقع پر بھارتی میڈیا کے انسٹاگرام پیج پر شو کی ایک پرومو ویڈیو جاری کی گئی ہے جس میں شو کے مہمان کے طور پر بالی وڈ اداکار فرحان اختر اور جاوید اختر موجود ہیں۔

(جاری ہے)

پرومو ویڈیو میں شو کے دوران امیتابھ بچن کی والدہ تیجی بچن کا آڈیو پیغام سنایا گیا، شو میں چلائی گئی آڈیو میں امیتابھ بچن کی والدہ کہہ رہی ہیں کہمیں بہت خوش قسمت ہوں اب میں جہاں بھی جاتی ہوں، میرے بیٹے کی وجہ سے مجھے لوگ اور بھی پیار اور عزت دیتے ہیں، ایک ماں کو زندگی میں اس سے زیادہ بڑی خوشی نہیں مل سکتی۔

اپنی والدہ تیجی بچن کے دل چھو لینے والے الفاظ سن کر امیتابھ بچن کو دوران شو ہی آبدیدہ ہوتے دیکھا جاسکتا ہے۔میڈیا رپورٹس کے مطابق امیتابھ بچن کی والدہ تیجی بچن کا انتقال 21 دسمبر 2007 کو ممبئی میں 93 سال کی عمر میں ہوا تھا۔