فیصل آباد ،باغبانوں کو اکتوبر کے آخر تک کھجور کے نئے پودے لگانے کا عمل مکمل کرنے کی ہدایت

جمعرات 9 اکتوبر 2025 13:32

فیصل آباد (اُردو پوائنٹ اخبارتازہ ترین - اے پی پی۔ 09 اکتوبر2025ء) ڈیٹ پام ریسرچ انسٹی ٹیوٹ کے ماہرین اثمار نے باغبانوں کو اکتوبر کے آخر تک کھجور کے نئے پودے لگانے کا عمل مکمل کرنے کی ہدایت کی ہے۔ انہوں نے کہا ہے کہ چونکہ اکتوبر کا مہینہ کھجور کے نئے پودے لگانے کے لئے موسمی حالات کے مطابق انتہائی موزوں ہے اس لئے باغبان مذکورہ مہینے کے اختتام تک کھجور کے نئے پودے لگانے کا عمل مکمل کر لیں۔

انہوں نے بتایاکہ کھجور کی کاشت کے لئے پانی کے اچھے نکاس والی ذرخیز میرا زمین کا انتخاب کیا جانا چاہیے۔ انہوں نے کہا کہ باغبان کھجور کے ایسے پودوں کا انتخاب کریں جن کا وزن 10سے15 کلو گرام تک اور وہ ہر لحاظ سے صحت مند اور بیماریوں سے پاک ہو۔انہوں نے کہا کہ پودے نکالنے کے لئے ایک مربع میٹر تک گڑھوں کی لمبائی، چوڑائی، گہرائی تک کھدائی کریں اور گڑھا کھودتے وقت اوپر کی 30سینٹی میٹر مٹی ایک طرف رکھیں اور باقی مٹی الگ رکھ دیں۔

(جاری ہے)

انہوں نے کہا کہ پودا لگانے سے قبل گڑھے کو2 سے3 ہفتے تک کھلا چھوڑدینا چاہیئے۔ انہوں نے مزید بتایاکہ پودے کی منتقلی سے پہلے نئے پودوں کی جڑیں 10سے12گھنٹے تک پانی میں بھگوئی جائیں اور پودے سے پودے کا فاصلہ 20سے25فٹ رکھا جائے۔ انہوں نےکہا کہ باغبان کلور پائریفاس بحساب ایک لیٹر فی 100لیٹر پانی میں ملا کر پودوں کے گھیرے میں سپرے کریں تاکہ پودے دیمک اور دیگر کیڑوں و بیماریوں سے محفوظ رہ سکیں۔ انہوں نے کہا کہ اس سلسلہ میں مزید معلومات ماہرین زراعت یا محکمہ زراعت کے فیلڈ سٹاف سے بھی حاصل کی جا سکتی ہیں۔