اذاخیل ڈرائی پورٹ پر نئی کسٹمز لیبارٹری نے کام شروع کردیا

جمعرات 9 اکتوبر 2025 16:41

اسلام آباد (اُردو پوائنٹ اخبارتازہ ترین - اے پی پی۔ 09 اکتوبر2025ء) کسٹمز نے تجارت میں سہولت فراہم کرنے کی غرض سے اذاخیل ڈرائی پورٹ پر نئی کسٹمز لیبارٹری قائم کر دی ہے، یہ لیبارٹری کپڑوں، پلاسٹک اور پلاسٹک سے بنی مصنوعات، خوردنی اشیا اور رنگوں کو جانچنے کے لیے بنیادی آلات سے لیس ہے۔

(جاری ہے)

ایف بی آر سے جمعرات کو جاری بیان کے مطابق اس سے پہلے ان اشیا کے نمونے جانچنےکے لئے کراچی، لاہور اور فیصل آباد کی لیبارٹریوں کو بھیجے جاتے تھے جس میں کئی دن لگ جاتے تھے اور اخراجات میں اضافہ ہو جاتا تھا، اب تقریباً 80 فیصد نمونوں کی جانچ مقامی لیبارٹری میں ہی کی جائے گی ۔

اذاخیل میں کسٹمز لیبارٹری کے قیام سے درآمد کنندگان کا ایک دیرینہ مطالبہ پورا ہو گیا ہے۔ انہوں نے لیبارٹری فعال ہونے پر اطمینان کا اظہار کرتے ہوئے اس اقدام کا خیر مقدم کیا کیونکہ اس سے کلیئرنس میں کم وقت صرف ہوگا ، لاگت میں کمی آئے گی اور ڈرائی پورٹ پر مال کے رکے رہنے کا دورانیہ کم ہوجائے گا ۔سرحد چیمبر آف کامرس کے صدر جنید الطاف نے بھی لیبارٹری کے قیام کو سراہا ہے۔