ماہرہ خان اور فواد خان کی فلم نیلوفر کا ٹریلر جاری

یہ فلم 28 نومبر 2025 کو ملک بھر کے سنیما گھروں میں ریلیز کی جائے گی

پیر 13 اکتوبر 2025 11:10

کراچی (اُردو پوائنٹ اخبارتازہ ترین - این این آئی۔ 13 اکتوبر2025ء) پاکستانی شوبز انڈسٹری کی ہردلعزیز آن اسکرین جوڑی اداکار فواد خان اور اداکارہ ماہرہ خان سے ملاقات کرنا چاہتے ہیں تو ہوجائے تیار، ایک بار پھر یہ جوڑی مداحوں سے ملنے آ رہی ہے۔مداحوں کا طویل انتظار اب ختم ہونے کو ہے، ان کی نئی رومانوی فلم نیلوفر 4 برس بعد بلآخر سنیما گھروں کی زینب بننے والی ہے۔

فلم کا ٹریلر جاری کر دیا گیا ہے، جس کے ساتھ ہی فلم کب ریلیز کی جائے گی، تاریخ بھی سامنے آگئی ہے۔

(جاری ہے)

ویڈیو شیئرنگ پلیٹ فارم پر 1 منٹ 38 سیکنڈ کا ٹریلر جاری کیا گیا ہے۔ فلم میں محبت، جذبات اور ڈرامے کا حسین امتزاج دکھایا گیا ہے۔ہدایتکار عمار رسول کی تحریر و ہدایت کردہ یہ فلم 28 نومبر 2025 کو ملک بھر کے سنیما گھروں میں ریلیز کی جائے گی۔فلم میں فواد خان اور ماہرہ خان مرکزی کرداروں میں نظر آئیں گے جبکہ دیگر کاسٹ میں مدیحہ امام۔ ثروت گیلانی، عتیقہ اوڈھو، بہروز سبزواری، گوہر شید، فیصل قریشی، سمیعہ ممتاز، راشید فاروق، چاند بریل، سیمی راحیل، عدیل ہاشمی، حرا ترین اور نوید شہزاد شامل ہیں۔فلم کا ٹریلر سامنے آتے ہی مداحوں میں زبردست جوش و خروش پیدا ہوگیا ہے۔