پاکستان اور آذربائیجان کے تعلقات باہمی اعتماد، احترام اور مشترکہ ترقی کے عزم پر مبنی ہیں،چیئرمین سینیٹ سید یوسف رضا گیلانی

اسلام آباد (اُردو پوائنٹ اخبارتازہ ترین - اے پی پی۔ 14 اکتوبر2025ء) چیئرمین سینیٹ سید یوسف رضا گیلانی نے کہا ہے کہ پاکستان اور آذربائیجان کے تعلقات باہمی اعتماد، احترام اور مشترکہ ترقی کے عزم پر مبنی ہیں،پاکستان خطے میں امن و خوشحالی کے فروغ کو اپنی ترجیحات میں شامل رکھتا ہے۔منگل کو سینیٹ سیکرٹریٹ کی جانب سے جاری بیان کے مطابق چیئرمین سینیٹ سید یوسف رضا گیلانی سے آذربائیجان کی سپیکر ملی مجلس صاحبہ غفارووا نے یہاں ملاقات کی ۔

ملاقات میں دوطرفہ تعلقات، پارلیمانی تعاون، تجارت، سرمایہ کاری اور علاقائی روابط کے فروغ پر تفصیلی تبادلہ خیال کیا گیا ۔چیئرمین سینیٹ نے کہا کہ پاکستان آذربائیجان کے ساتھ برادرانہ تعلقات کو انتہائی قدر کی نگاہ سے دیکھتا ہے۔

(جاری ہے)

پاکستان اور آذربائیجان کے تعلقات باہمی اعتماد، احترام اور مشترکہ ترقی کے عزم پر مبنی ہیں،قلیل مدت میں دونوں ممالک نے مثالی تعلقات قائم کیے جو دنیا کے لیے قابلِ تقلید ہیں۔

انہوں نے کہا کہ اعلیٰ سطحی رابطے تعلقات کو مزید وسعت دینے کے عزم کا مظہر ہیں،آذربائیجان کے صدر الہام علیئیف کا متوقع دورہ دوطرفہ تعلقات کو نئی مضبوط بنیاد فراہم کرے گا،دونوں ملکوں کے ادارہ جاتی روابط باقاعدگی سے جاری ہیں جو تعلقات کے استحکام کا ثبوت ہیں۔ سید یوسف رضا گیلانی نے کہا کہ دونوں ممالک کی پارلیمانوں کے تعلقات مزید مضبوط ہوئے ہیں۔

انہوں نے فروری 2025ء میں باکو میں ہونے والی ایشین پارلیمانی اسمبلی میں شرکت کو خوشگوار تجربہ قرار دیتے ہوئے کہا کہ پارلیمانی فرینڈشپ گروپس کے درمیان روابط عوامی سطح پر تعلقات کے فروغ کا باعث بنیں گے۔ چیئرمین سینیٹ نے آذربائیجان کی سپیکر کو نومبر میں اسلام آباد میں ہونے والی بین الپارلیمانی اسپیکر کانفرنس میں شرکت کی دعوت دی ۔

۔پاکستان آذربائیجان کو ایک اہم سرمایہ کار شراکت دار کے طور پر دیکھتا ہے۔ سید یوسف رضا گیلانی نے کہا کہ دونوں ممالک کے درمیان تجارتی روابط میں بہتری کی گنجائش موجود ہے،پاکستان خطے میں امن و خوشحالی کے فروغ کو اپنی ترجیحات میں شامل رکھتا ہے،پاکستان وسطی اور جنوبی ایشیا کے درمیان تجارتی پل کے طور پر اہم کردار ادا کر سکتا ہے،سیاحت کے شعبے میں باہمی تعاون کے وسیع مواقع موجود ہیں، پاکستان اور آذربائیجان کے تعلقات وقت کے ساتھ مزید مضبوط ہوں گے۔

چیئرمین سینیٹ نےصدر الہام علیئیف کو پاکستان کے دورے کی دعوت دی اور کہا کہ پاکستان آذربائیجان کی قیادت کے پرتپاک استقبال کا منتظر ہے۔ اس موقع پرآذربائیجان کی سپیکر نے چیئرمین سینیٹ کا شکریہ ادا کیا۔سپیکر نے دوطرفہ تعاون کو مزید مستحکم بنانے کے عزم کا اظہارکیا۔