ایمن خان نے شادی کے بعد کام چھوڑ دیا

ایمن جتنی خود مختار ہے، میں ذبردستی اس سے کوئی کام نہیں کروا سکتا ،اداکار منیب بٹ

پیر 13 اکتوبر 2025 11:10

کراچی (اُردو پوائنٹ اخبارتازہ ترین - این این آئی۔ 13 اکتوبر2025ء) پاکستانی شوبز انڈسٹری سے وابستہ معروف اداکارہ ایمن منیب اسکرین سے دور کیوں ہیں، اس کی وجہ ان کے شوہر و اداکار منیب بٹ نے بتادی۔حال ہی میں اداکار نے ایک پوڈکاسٹ میں شرکت کی جہاں انہوں نے نجی زندگی کے حوالے سے کھل کر بات کی۔دورانِ انٹرویو انہوں نے ایک سوال کا جواب دیتے ہوئے کہا کہ ایمن جتنی خود مختار ہے، میں ذبردستی اس سے کوئی کام نہیں کروا سکتا جب تک اس کی اپنی مرضی شامل نہ ہو، اور یہ ہمارے دین میں بھی نہیں ہے کہ اپنی بیوی پر اپنی مرضی تھوپیں۔

انہوں نے کہا کہ ہمارا کام باقی کام سے الگ ہے، کیونکہ جب ہمارے پروجیکٹ پر کام چل رہا ہوتا ہے تو 50 سے 60 دن بیحد مصروف رہتے ہیں، 10 سے 12 گھنٹے شوٹ ہوتا ہے، پھر اپنے آپ پر بھی توجہ دینی ہوتی ہے ایسے میں بچے نظر انداز ہو جاتے ہیں۔

(جاری ہے)

ان کا کہنا ہے کہ میرا ماننا ہے کہ بچوں پر ہم خود توجہ دیں، گھریلو ملازمہ سے ان کی تربیت کے کام نہ لیں کیونکہ آج ہم جو انویسٹ کریں گے کل وہی ہمیں ریٹرن ملے گا۔

میں نے کئی ایسے کیسز دیکھے ہیں جہاں بچے بڑے ہونے کے بعد ماں باپ کو وقت نہیں دیتے، خرچہ تو اٹھا لیں گے لیکن ان کے ساتھ بیٹھنے کا وقت نہیں ہوگا۔ایک اور سوال کا جواب دیتے ہوئے انہوں نے کہا کہ 2 بیٹیوں کے بعد ہر ماں باپ کی طرح میری بھی خواہش تھی کہ میرا بیٹا ہو لیکن بیٹی ہوئی اور اس پر مجھے کوئی شکایت نہیں ہے۔ان کا کہنا ہے کہ جن سالوں میں بیٹیاں پیدا ہوئیں، وہ سال میری زندگی کے سب سے بہترین سال رہے۔

اللہ نے بیٹی سے نوازا اس پر بھی میں شکر گزار ہوں کیونکہ بیٹیاں اپنے نصیب خود لکھوا کے آتی ہیں، میں نے ان کے نصیب سے اپنی قسمت بدلتے دیکھی ہے۔انہوں نے یہ بھی کہا کہ اگر بیٹا ہوتا تو شاید اس کے اتنے نخرے نہ اٹھاتا جتنے بیٹیوں کے اٹھاتا ہوں کیونکہ بیٹے کو یہ سکھانا ہوتا ہے کہ اسے مستقبل میں زمانے کی سختیاں برداشت کرنی ہے، اس کا کام بیٹیوں کے مقابلے میں زیادہ محنت طلب ہوگا۔