فیصل آباد چیمبر کے پلیٹ فارم سے بزنس کمیونٹی کے تمام مسائل کے حل کےلئے کوششیں کی جائیں گی، فاروق یوسف شیخ

پیر 13 اکتوبر 2025 14:47

فیصل آباد (اُردو پوائنٹ اخبارتازہ ترین - اے پی پی۔ 13 اکتوبر2025ء) فیصل آباد چیمبر آف کامرس اینڈانڈسٹری کے صدر فاروق یوسف شیخ نے کہا کہ اندرو ن شہر کے آٹھوں بازار اور ان سے ملحقہ گلیاں اورمارکیٹیں ملک کی معاشی ترقی میں اہم کردار ادا کر رہی ہیں لہٰذاان کے مسائل کو حل کرنے کیلئے چیمبر کے پلیٹ فارم سے بھر پور کوششیں کی جائیں گی۔انہوں نے یہ بات انجمن تاجران وکیلاں والی گلی کچہری و چنیوٹ بازار کے ایک وفد سے خطاب کرتے ہوئے کہی، جس نے صدر ڈاکٹر محمود یوسف شیخ کی سربراہی میں ان سے ملاقات کی۔

انہوں نے کہا کہ وکیلا ں والی گلی میں بجلی کی تاروں سے حادثات کے علاوہ آتشزدگی کا بھی خطرہ رہتا ہے اس لئے ان کو زیر زمین کرنے کا بندوبست کیا جانا چاہیے۔ اسی طرح پارکنگ کے مسائل سے کاروبار بری طرح متاثر ہو رہا ہے اِن کو حل کرنے کیلئے بھی فوری اقدامات کیے جائیں۔

(جاری ہے)

انہوں نے فراہمی اور نکاسی آب کے مسائل کو حل کرنے پر بھی زور دیا اور کہا کہ اِس ایسوسی ایشن کے عہدیداروں کی میونسپل کارپوریشن کے چیف آفیسر سے ملاقات کرانے کا بندوبست کیا جائے گا تاکہ وہ علاقے کی ترقی کے حوالے سے براہ راست تجاویز متعلقہ حکام تک پہنچا سکیں۔ اس موقع پر جنرل سیکرٹری شیخ قدیر ظہیر، شیخ احسان الٰہی، حاجی ظفر حسنی، رانا عمران، شیخ عثمان، ملک گلزار اور شیخ شفیق بھی موجود تھے۔