سعودی عرب نے فیفا ورلڈ کپ 2026کے لئے کوالیفائی کرلیا

بدھ 15 اکتوبر 2025 09:10

جدہ (اُردو پوائنٹ اخبارتازہ ترین - اے پی پی۔ 15 اکتوبر2025ء) سعودی عرب کی ٹیم نے فیفا ورلڈ کپ 2026 کےلئے باضابطہ طور پر کوالیفائی کرلیا ہے، اردو نیوز کے مطابق سعودی عرب اور عراق کی فٹ بال ٹیموں کے درمیان کھیلا گیا فیصلہ کن میچ بغیر کسی گول کے برابر ی پر ختم ہوگیا ، دونوں ٹیمیں کوئی گول نہ کرسکیں۔جدہ کے کنگ عبداللہ سپورٹس سٹی کے الانما سٹیڈیم میں میچ کا آغاز ہوا تو گرین فالکنز نے میچ کے دونوں ہاف میں گول کرنے کے مواقع گنوا دیے۔

میچ شروع ہونے سے قبل ہی سٹیڈیم کے تمام سٹینڈز بھر گئے۔ میچ دیکھنے کےلیے سٹیڈیم میں 60 ہزار افراد موجود تھے۔سعودی وزیر سپورٹس اور دیگر عہدیداروں نے بھی سٹیڈیم میں بیٹھ کر میچ دیکھا۔گرین فالکنز نے ساتویں مرتنہ فیفا ورلڈ کپ کےلیے کوالیفائی کرکے ایک تاریخ رقم کی ہے۔

(جاری ہے)

گرین فالکنز کو فیفا ورلڈ کپ 2026 کوالیفائی کرنے کےلیے عراق کے ساتھ میچ میں کامیابی یا کم از کم ڈرا کھیلنا تھا ۔

اسے گول اوسط کے لحاظ سے عراقی ٹیم پر برتری حاصل تھی جبکہ عراقی ٹیم کو براہ راست کوالیفائی کرنے کےلیے یہ میچ جیتنا ضروری تھا۔ دونوں ٹیمیں ایشیائی پلے آف کے گروپ ’بی‘ میں شامل ہیں۔اس میچ میں سعودی ٹیم گول کیپر نواف العقیدی، صالح ابو الشامات، حسان تمبکتی، جھاد ذکری، ایمن یحیی، عبداللہ الخیبری، ناصر الدوسری، مصعب الجویر، صالح ابو الشامات، فراس الریکان اور سالم الدوسری پر مشتمل تھی۔یاد رہے سعودی عرب نے انڈونیشیا کو 2-3 سے شکست دی تھی جبکہ عراق نے اسی ٹیم کو 0-1گول سے ہرایا تھا۔

Facebook Twitter Google + Share on Whatsapp

سعودی عرب نے فیفا ورلڈ کپ 2026کے لئے کوالیفائی کرلیا

متعلقہ عنوان :

مزید کھیلوں کی خبریں