محکمہ زراعت نے مختلف ٹی وی چینلز کو زرعی پروگرامز کی تیاری اور دیگر مواد کی فراہمی میں بھر پور تعاون کاآغاز کر دیا

بدھ 15 اکتوبر 2025 15:47

فیصل آباد (اُردو پوائنٹ اخبارتازہ ترین - اے پی پی۔ 15 اکتوبر2025ء) زرعی اجناس کی بھر پور کاشت اور بمپر کراپ کے حصول کیلئے کھادوں کے متناسب و بروقت استعمال سے اربوں روپے کافائدہ حاصل کیاجاسکتاہے ۔

(جاری ہے)

اس ضمن میں کاشتکاروں کی زرعی ایجوکیشن کی شدت سے ضرورت ہے جس کیلئے محکمہ زراعت نے مختلف ٹی وی چینلز کو زرعی پروگرامز کی تیاری اور دیگر مواد کی فراہمی میں بھر پور تعاون کاآغاز کردیا ہے تاکہ کاشتکار ان پروگرامز، اطلاعات، معلومات، رہنمائی سے استفادہ کرکے زرعی اجناس کی کاشت میں جدید ٹیکنالوجی کے ذریعے اضافہ کرتے ہوئے ملک کے معاشی واقتصادی استحکام میں معاون ثابت ہو سکیں۔

نظامت زرعی اطلاعات محکمہ زراعت کے مطابق ان کا ادارہ پندرہ روزہ زراعت نامہ اور ٹی وی پروگرامزکے ذریعے عام کسان کی دہلیز تک جدید ٹیکنالوجی منتقل کرنے کیلئے بھرپور کاوشیں بروئے کار لا رہا ہے۔ انہوں نے بتایا کہ اس وقت پنجاب میں بیس ہزار افراد کیلئے صرف ایک توسیعی کارکن دستیاب ہے یہی وجہ ہے کہ تمام لوگوں تک رسائی کیلئے اقدامات کو ممکن بنایا جارہا ہے۔انہوں نے کہا کہ نجی شعبے میں زرعی اطلاعاتی نظام کیلئے کاوشوں کو سرکاری شعبے کی مدد سے زیادہ مربوط بنایا جا سکتا ہے جبکہ اس مقصد کیلئے سوشل میڈیا بھی سب سے بڑا ہتھیار ثابت ہو سکتا ہے۔