بھارت: سرجن شوہر نے ڈاکٹر بیوی کو انجکشن دیکر قتل کردیا، 6 ماہ بعد گرفتار

پولیس نے خاتون کے شوہر اور جنرل سرجن ڈاکٹر مہندر ریڈی کو قتل کے الزام میں گرفتار کرلیا

بدھ 15 اکتوبر 2025 20:50

بنگلور(اُردو پوائنٹ اخبارتازہ ترین - این این آئی۔ 15 اکتوبر2025ء) بھارتی ریاست کرناٹک کے شہر بنگلور میں ڈاکٹر شوہر نے اپنی ہم پیشہ بیوی کو بے ہوشی کا انجکشن دیکر قتل کردیا، واقعے کے 6 ماہ بعد شوہر کو گرفتار کرلیا گیا۔بھارتی میڈیا کے مطابق اپریل میں مشرقی بنگلور میں مرنے والی جلد کی ڈاکٹر کارتیکا ریڈی کی موت کا معمہ آخر کار حل ہوگیا، پولیس نے خاتون کے شوہر اور جنرل سرجن ڈاکٹر مہندر ریڈی کو قتل کے الزام میں گرفتار کرلیا ہے۔

پولیس کے مطابق21 اپریل کو ڈاکٹر کارتیکا اچانک بے ہوش ہو گئی تھیں، جس کے بعد ان کے شوہر نے انہیں قریبی اسپتال منتقل کیا جہاں ڈاکٹروں نے خاتون کو مردہ قرار دیا تھا۔ابتدائی طور پر معاملہ کو ’’غیر فطری موت‘‘ کے طور پر درج کیا گیا تھا، تاہم جائے وقوعہ سے ملنے والے شواہد جن میں کینولا سیٹ، انجکشن ٹیوب اور دیگر طبی آلات موجود تھے، اس نے پولیس کو شک میں ڈال دیا تھا۔

(جاری ہے)

فورنزک رپورٹ میں مقتولہ کے جسم میں طاقتور بے ہوشی کی دوا کی موجودگی کی تصدیق ہوئی، جو عام طور پر سرجری میں استعمال ہوتی ہے۔رپورٹ سامنے آنے کے بعد مقتولہ کے والد نے 13 اکتوبر کو پولیس میں باقاعدہ شکایت درج کروائی، جس کے بعد پولیس نے 14 اکتوبر کو ڈاکٹر مہندر ریڈی کو ساحلی شہر منی پال سے گرفتار کرلیا۔بنگلورو پولیس کمشنر سیمانتھ کمار سنگھ کے مطابق تمام شواہد شوہر کے ملوث ہونے کی نشاندہی کر رہے ہیں۔

اس نے واقعے کے وقت کسی بھی ممکنہ طبی خرابی کا ذکر نہیں کیا اور بعد میں پتہ چلا کہ مقتولہ کو سکون آور انجکشن دیا گیا تھا، جو بدنیتی پر مبنی عمل کو ظاہر کرتا ہے۔پولیس کے مطابق ملزم نے اپنی طبی مہارت کا استعمال کرتے ہوئے بیوی کی موت کو قدرتی ظاہر کرنے کی کوشش کی۔ دونوں ڈاکٹر وکٹوریا اسپتال میں تعینات تھے اور ان کی شادی گزشتہ سال 26 مئی کو ہوئی تھی۔