گوشت اور دودھ کی زیادہ پیداوار کے لئے جانوروں کے پیٹ اور جلد کے کیڑوں کا تدارک ضروری ہے،ایڈیشنل ڈائریکٹر محکمہ لائیوسٹاک سیالکوٹ

سیالکوٹ (اُردو پوائنٹ اخبارتازہ ترین - اے پی پی۔ 16 اکتوبر2025ء) ایڈیشنل ڈائریکٹر محکمہ لائیوسٹاک و ڈیری ڈویلپمنٹ سیالکوٹ ڈاکٹر ظفر عباس نے کہا ہے کہ گوشت اور دودھ کی زیادہ پیداوار کے لئے جانوروں کے پیٹ اور جلد کے کیڑوں کا تدارک نہایت ضروری ہے۔ انہوں نے جمعرات کو اے پی پی سے گفتگو کرتے ہوئے کہا کہ جانوروں کے پیٹ کے کیڑوں کی وجہ سے ان کی جسمانی صحت کمزور ہوجاتی ہے اور دودھ اور گوشت کی پیداور میں نمایاں کمی آجاتی ہے۔

انہوں نے کہا کہ جانوروں میں کیڑ ے دو قسم کے ہوتے ہیں ،اندرونی کیڑے اور بیرونی کیڑے ،اندرونی کیڑے گول چپٹے فیتا نما وار اور لمبے ہوتے ہیں،ان کی موجودگی کی نشانیاں یہ ہیں کہ جانورگوبر پتلا اور بدبودار کرتے ہیں، آنکھوں سے پانی اور گندآتا ہے، سستی آجاتی ہے ،جانور کمزور ہوکر سوکھ جاتا ہے،جبڑے کے نیچے پانی جمع ہوجاتا ہے،لیور اور جوڑوں پر ورم آنا ،بالوں کا جھڑنا، جلد کھردری ہونا شامل ہیں، ایڈیشنل ڈائریکٹر نے کہا کہ اگر یہ نشانیاں ہیں تو جانور کی ڈی ورمنگ فورا کریں یعنی کیڑے مار دوا پلائیں ۔

(جاری ہے)

انہوں نے بتایا کہ اچھا طریقہ یہ ہے کہ جانور کو جتنی دوائی دینی ہے اتنا پانی ملا لیں تو جانور کو نگلنے میں آسانی رہتی ہے، بیرونی ڈی ورمنگ میں چیچڑ جوئیں، پسو کا شمار ہوتا ہے اس کے لئے آپ اپنے جانور کا خیال ر کھیں ان کو چیک کرتے رہیں،جانور کاکھجلی کرنا، جسم کا دیوار وغیرہ سے رگڑنا اور جانور کے جسم سے خون کا سمنا کی صورت میں بیرونی ڈی ورمنگ کرنا ضروری ہے اس کے لیے انجیکشن آئیوٹیک سپر استعمال کریں یہ انجکشن گھبن جانوروں کو لگانے سے گریز کریں اورگھبن جانوروں کے لئے انجیکشن ڈیکٹران استعمال کریں۔

ڈپٹی ڈائریکٹر نے کہا کہ بیرونی ڈی ورمنگ ہمیشہ ٹھنڈی کرکے اور ٹھنڈے وقت عموما شام کے وقت کریں، ایک دفعہ کرنے کے 14 دن کے بعد دوبارہ بیرونی ڈی ورمنگ کریں اور پھر ہر دفعہ یہ عمل تین ماہ بعد دوہرانا ضروری ہے۔انہوں نے کہا کہ اندرونی ڈی ورمنگ کی دوا بہتر ہے صبح کے وقت جب جانور خالی پیٹ ہو اس وقت پلا دیں اور 2 گھنٹے تک کھانے کو کچھ نہ دیں، اس طرح اس کا اثر زیادہ ہوتا ہے اور ڈی ورمنگ کرنے سے پہلے جانور کو گڑ کھلائیں اس سے بہتر رزلٹ ملتا ہے۔

انہوں نے بتایا کہ ڈی ورمنگ کی دوائی پلانے کے بعد عموما ً جانور کوموشن لگ جاتے ہیں انہیں روکنے کی کوشش نہ کریں یہ خود ہی ٹھیک ہو جاتے ہیں، پھر 14 دن کے بعد دوبارہ ڈی ورمنگ کریں کیونکہ کیڑے پہلی ڈی ورمنگ سے مر جاتے ہیں لیکن ان کے انڈے رہ جاتے اس لئے ان کو ختم کرنے کے لیے دوبارہ ڈی ورمنگ کریں۔