پنجاب سیڈ کارپوریشن نے قصبہ کی سطح پر وافر مقدار میں گندم کا منظور شدہ بیج اپنے سیلز پوائنٹس اور ڈیلرز کو فراہم کر دیا

جمعرات 16 اکتوبر 2025 12:48

فیصل آباد (اُردو پوائنٹ اخبارتازہ ترین - اے پی پی۔ 16 اکتوبر2025ء) پنجاب سیڈ کارپوریشن نے زیادہ غلہ اگاؤ مہم کے تحت فیصل آباد ڈویژن سمیت صوبہ بھر میں قصبہ کی سطح پر50کلوگرام تھیلوں میں گندم کا منظور شدہ اقسام کا شہ زور بیج اپنے سیلز پوائنٹس اور ڈیلرز کو فراہم کر دیا ۔ ترجمان پنجاب سیڈ کارپوریشن نے بتایا ہے کہ یہ بیج خالص، صحتمند، اگاؤ کی بہترین صلاحیت،شاندار قوت مدافعت کا حامل اور جدید ترین سائنسی مراحل میں تیار کیا گیا ہے۔

(جاری ہے)

انہوں نے کہا کہ کاشتکار مذکورہ شہ زور تصدیق شدہ بیج کاشت کر کے اپنی انفراد ی اور ملک کی گندم کی اجتماعی پیداوار میں بھر پور اضافہ کر سکتے ہیں۔ انہوں نے بتایاکہ شہ زور گندم کا بیج 50کلو گرام کی پیکنگ میں وافر مقدار میں دستیاب ہے اس لئے کاشتکار صرف تصدیق شدہ بیج ہی استعمال کریں۔ انہوں نے کہاکہ تصدیق شدہ و معیاری بیج کی کاشت سے نہ صرف بیماریوں سے پاک صحت مند فصل حاصل ہو گی بلکہ فی ایکڑ پیداوار میں بھی اضافہ ہوگا۔ انہوں نے کہا کہ اگر کاشتکاروں کو بیج کے حصول میں کسی قسم کی کوئی مشکل در پیش ہو تو وہ فوری طور پر پنجاب سیڈ کارپوریشن کے قریبی دفتریا ڈسٹرکٹ آفیسر زراعت سے بھی رابطہ کر سکتے ہیں۔