کمشنر سرگودہا کا نوازشریف ایسوسی ایٹ کالج اور مریم نواز ہیلتھ کلینک چک 103 جنوبی کا دورہ

ہفتہ 18 اکتوبر 2025 22:32

سرگودہا (اُردو پوائنٹ اخبارتازہ ترین - اے پی پی۔ 18 اکتوبر2025ء) کمشنر سرگودہا ڈویژن جہانزیب اعوان نے گورنمنٹ محمد نواز شریف ایسوسی ایٹ کالج اور مریم نواز ہیلتھ کلینک چک نمبر 103 جنوبی کا دورہ کیا۔ اُنہوں نے کالج میں تدریسی عمل، طلبہ کی انرولمنٹ اور فیکلٹی کارکردگی کا جائزہ لیا۔ کمشنر نے کلاس رومز کا معائینہ کیا اور طلبہ سے مستقبل کے منصوبوں، نصاب اور تعلیم سے متعلق سوالات کیے۔

انہوں نے طلبہ کو نصیحت کی کہ وہ اپنی تعلیم پر بھرپور توجہ دیں، وقت کا ضیاع نہ کریں اور انٹرنیٹ کو مثبت اور تعلیمی مقاصد کے لیے استعمال کریں۔کمشنر سرگودہا نے اساتذہ پر زور دیا کہ وہ طلبہ کی بہتر رہنمائی کریں، ان کی صلاحیتوں کو نکھاریں اور کالج کے نظم و ضبط کو مزید مضبوط بنائیں۔

(جاری ہے)

انہوں نے کہا کہ طلبہ میں ٹیلنٹ کی کمی نہیں، ضرورت صرف صحیح سمت اور محنت کی ہے۔

انہوں نے اساتذہ کو ہدایت کی کہ طلبہ میں مقابلے کا رجحان پیدا کریں۔انہوں نے ڈپٹی ڈائریکٹر کالجز کو ہدایت کی کہ عمارت کی مرمت و بحالی کے اقدامات کیے جائے اور تعلیمی ماحول کو مزید بہتر بنایا جائے۔ کمشنر نے طلبہ کو ہدایت دی کہ موٹرسائیکل پر آنے والے طلبہ ہیلمٹ کا لازمی استعمال کریں۔ اس موقع پر ڈپٹی ڈائریکٹر کالجز ابو الحسن نقوی بھی ان کے ہمراہ تھے۔

بعد ازاں، کمشنر سرگودہا نے مریم نواز ہیلتھ کلینک چک نمبر 103 جنوبی کا بھی معائنہ کیا۔ اس موقع پر ایکسین بلڈنگ بدر سلطان نے بریفنگ دیتے ہوئے بتایا کہ کلینک کی ری ویمپنگ تقریباً مکمل ہو چکی ہے اور اگلے ہفتہ بلڈنگ محکمہ صحت کے حوالے کر دی جائے گی۔ انہوں نے بتایا کہ ضلع بھر میں 21 بی ایچ یوز کی ری ویمپنگ کا عمل جاری ہے جس کے لیے فنڈز جاری کیے جا چکے ہیں۔