پاک فضائیہ کا دستہ جدید ترین جے ایف 17 تھنڈر بلاک تھری لڑاکا طیاروں کے ہمراہ فضائی جنگی مشق ’انڈس شیلڈ الفا‘ میں شرکت کیلئے آذربائیجان پہنچ گیا

اتوار 19 اکتوبر 2025 13:30

راولپنڈی (اُردو پوائنٹ اخبارتازہ ترین - اے پی پی۔ 19 اکتوبر2025ء) پاک فضائیہ کا دستہ جدید ترین جے ایف۔17 تھنڈر بلاک تھری لڑاکا طیاروں کے ہمراہ دو طرفہ فضائی جنگی مشق ’’انڈس شیلڈ الفا‘‘ میں شرکت کےلئے آذربائیجان پہنچ گیا ہے، اس مشق کا مقصد دونوں برادرانہ فضائی افواج کے درمیان باہمی تفہیم ، حکمت عملی سے ہم آہنگی اور دوطرفہ تعاون کو بڑھانا ہے۔

اتوار کو آئی ایس پی آر کی جانب سے جاری بیان کے مطابق پاک فضائیہ کے لڑاکا طیاروں نے پاکستان میں اپنے ہوم بیس سے آذربائیجان تک بغیر رکے اپنا سفر مکمل کیا، اس دوران پاک فضائیہ نے فضا سے فضا میں طیاروں میں ایندھن بھرنے کے آپریشنز انجام دیئے، فضا میں ایندھن بھرنے کا یہ پیچیدہ آپریشن پاک فضائیہ نے اپنے آئی ایل 78 ایئریل ٹینکر کے ذریعے انتہائی درستگی سے انجام دیا، جس سے پاک فضائیہ کے لڑاکا طیاروں کی طویل فاصلاتی صلاحیت ایک بار پھر آشکار ہوئی اور اس سے پاک فضائیہ کے عملہ کی پیشہ وارانہ مہارت اور طویل بین الاقوامی تعیناتیوں کےلئے اس کی تیاری کا اظہار ہوتا ہے۔

(جاری ہے)

دونوں ملکوں کے درمیان یہ مشق جدید فضائی جنگی حکمت عملیوں ، مشترکہ مشن کی منصوبہ بندی اور تیزی سے ترقی پذیر ٹیکنالوجی اور بدلتی ہوئی فضائی طاقت کے ماحول میں عمل درآمد پر توجہ دی گی ، یہ مشق آپریشنل بصیرت کے تبادلے اور ابھرتے ہوئے فضائی دفاعی چیلنجوں کےلئے مشترکہ رد عمل کو مضبوط کرنے کےلئے ایک اہم پلیٹ فارم ثابت ہو گی۔ آئی ایس پی آر کے مطابق پاکستان ایئر فورس کے دستے کی مشق ’’ انڈس شیلڈ الفا‘‘ میں شرکت پاک فضائیہ کے خطے کے استحکام اور عالمی فوجی تعاون کے لئے پائیدار عزم کا اعادہ کرتی ہے، یہ پاک فضائیہ کے جدید جنگی تقاضوں کے مطابق مسلسل ترقی اور موافقت کے غیر متزلزل عزم کو بھی ظاہر کرتا ہے جبکہ فضائی آپریشن کے ہر شعبے میں اپنی شاندار روایات کو برقرار رکھتا ہے۔