خوش قسمت ہیں وہ والدین جن کی اولاد اپنے سینے میں قرآن پاک محفوظ کرتے ہیں،ملک رشید احمد خاں ایڈووکیٹ

اتوار 14 دسمبر 2025 14:05

قصور(اُردو پوائنٹ اخبارتازہ ترین - این این آئی۔ 14 دسمبر2025ء) آسمانی چار کتابوں میں سے قرآن پاک کی حفاظت کا ذمہ اللہ تعالی نے خود لے رکھا ہے۔ دنیا بھر میں کروڑوں لوگوں کے سینوں میں محفوظ ہونے والی کتاب قرآن مجید ہے اور اس کا یاد ہونا بھی اسی کلام کا معجزہ ہے۔ ان خیالات کا اظہار وفاقی وزیر مملکت برائے فوڈ سکیورٹی اینڈ ریسرچ ملک رشید احمد خاں ایڈووکیٹ نے دارارقم سکول رائے ونڈ روڈ قصور میں کوارڈی نیٹر این اے 132 ملک خالد عمر کے بیٹے حافظ ملک آفاق خالد کے حفظ قرآن کرنے پر تکمیل حفظ قرآن کی منعقدہ تقریب سے خطاب کرتے ہوئے کیا۔

اس موقع پر ملک خالد عمر خاں ایڈووکیٹ، ملک مسعود اشرف خاں، ملک عاطف رشید خاں، ملک ساجد عمر خاں، ملک ارشد عمر خاں، ملک ماجد عمر خاں، ڈاکٹر اصغر علی، فیاض انجم سہوترا کے علاوہ دارارقم سکول کے ڈائریکٹر صہیب احمد سمیت اساتذہ اور طلبا کی بڑی تعداد بھی موجود تھی۔

(جاری ہے)

ملک رشید احمد خاں ایڈووکیٹ نے کہاکہ خوش قسمت ہیں وہ والدین جن کی اولاد اپنے سینے میں قرآن پاک محفوظ کرتے ہیں۔

اس سے بڑا کوئی انعام نہیں۔ انہوں نے مزید کہاکہ جو بچے اور بچیاں حفظ قرآن کرتے ہیں انہیں یاد بھی رکھنا چاہیے۔ اللہ تعالی کے پیارے نبی کریم ﷺ نے ارشاد فرمایا کہ حافظ قرآن اپنے خاندان کے کئی لوگوں کو جنت میں لے جائے گا۔ بعدازاں وفاقی وزیر مملکت نے طلبا اور سٹاف کو تعریفی سرٹیفکیٹ تقسیم کیے جبکہ ادارہ ہذا نے وفاقی وزیر مملکت ملک رشیداحمدخاں ایڈووکیٹ کی اسلامی خدمات کو سراہتے ہوئے انہیں شیلڈ پیش کی۔