وین میڈسن کا ٹی 20 ورلڈ کپ میں حیران کن کارکردگی کا عزم

لاہور (اُردو پوائنٹ اخبارتازہ ترین - اے پی پی۔ 09 فروری2026ء) آئی سی سی مینز ٹی 20 ورلڈ کپ 2026 میں پہلی بار شرکت کرنے والی اطالوی ٹیم کے کپتان وین میڈسن نے واضح کیا ہے کہ اٹلی محض تعداد پوری کرنے کے لیے نہیں آیا بلکہ مقابلے جیتنے کا پختہ عزم رکھتا ہے۔اٹلی فٹبال ورلڈ کپ 4 بار جیت چکا ہے اور اس وقت سرمائی اولمپکس کی میزبانی بھی کر رہا ہے، تاہم میڈسن کا کہنا ہے کہ کرکٹ میں بھی ان کی ٹیم نئی تاریخ رقم کرنے کے لیے تیار ہے۔

اطالوی سکواڈ میں مختلف پس منظر رکھنے والے کھلاڑی شامل ہیں، جن میں 4 بھائیوں پر مشتمل جوڑیاں بھی شامل ہیں، جو ٹیم کے اتحاد کی علامت ہیں۔42 سالہ وین میڈسن نے جو برنز کے ڈراپ ہونے کے بعد کپتانی سنبھالی۔ وہ دوسری بار ورلڈ کپ کھیل رہے ہیں، اس سے قبل وہ 20 سال قبل جنوبی افریقہ کی جانب سے ہاکی ورلڈ کپ میں حصہ لے چکے ہیں۔

(جاری ہے)

میڈسن کی قیادت میں اٹلی نے حالیہ ہفتوں میں آئرلینڈ، کینیڈا اور متحدہ عرب امارات کو شکست دے کر شاندار کارکردگی کا مظاہرہ کیا ہے۔

میڈسن نے اپنے ایک بیان میں کہا ہم دبائو میں بھی خود پر اعتماد رکھنا ہماری اصل آزمائش ہوگی۔انہوں نے کہا کہ اگرچہ اٹلی کو انڈر ڈاگ سمجھا جا رہا ہے، مگر ٹیم اس ٹورنامنٹ کے ذریعے اطالوی کرکٹ کے لیے ایک مضبوط ورثہ چھوڑنا چاہتی ہے۔ انہوں نے مزید کہا پہلی بار2007 میں اٹلی کی نمائندگی کے حوالے سے بات چیت شروع ہوئی تھی۔ 2012 میں وہ ورلڈ کپ کوالیفائر کھیلنے والے تھے مگر ڈربی شائر کی کپتانی کی ذمہ داری کے باعث دستبردار ہو گئے۔

2023 میں ناکامی کے بعد انہوں نے2026 میں ٹیم کو ورلڈ کپ تک پہنچانے میں کلیدی کردار ادا کیا۔ انہوں نے کہا کہ یہ میرے خاندان اور ورثے کے لیے بہت بڑا اعزاز ہے۔ میڈسن کے مطابق اس ورلڈ کپ میں اچھی کارکردگی اطالوی کرکٹ کے مستقبل کے لیے نہایت اہم ہے، کیونکہ ملک میں اس وقت ایک بھی گھاس کی پچ موجود نہیں، بہتر نتائج سے نہ صرف فنڈنگ بڑھے گی بلکہ کھیل کے انفراسٹرکچر کو بھی فروغ ملے گا۔

انہوں نے بتایا کہ پہلی بار اٹلی میں ٹیم کے تمام میچز، سیمی فائنل اور فائنل براہِ راست ٹی وی پر دکھائے جائیں گے، جو کرکٹ کی ترقی کے لیے ایک بڑا قدم ہے۔ ٹیم میں آسٹریلیا میں پیدا ہونے والے دو جوڑوں، جسٹن اور انتھونی موسکا، اور ہیری اور بین منینٹی پر خاص نظریں ہوں گی، جبکہ لیگ سپنر کرشن کالوگاماجے کو بھی اہم ہتھیار قرار دیا جا رہا ہے۔

گروپ سی میں اٹلی کا سامنا ویسٹ انڈیز، سکاٹ لینڈ، نیپال اور انگلینڈ سے ہوگا۔ میڈسن خاص طور پر انگلینڈ کے خلاف میچ کے لیے پرجوش ہیں۔ انہوں نے کہا، ٹی 20 ایک ایسا فارمیٹ ہے جہاں کچھ بھی ہو سکتا ہے۔ اگر ایک دو کھلاڑی چل پڑیں اور بڑی ٹیم کا دن خراب ہو، تو نتیجہ بدل سکتا ۔آخر میں میڈسن نے کہا،جب میں نے2006 کے بعد ہاکی چھوڑ کر کرکٹ شروع کی تھی تو کبھی خواب میں بھی نہیں سوچا تھا کہ اٹلی کے لیے ورلڈ کپ کھیلوں گا۔ یہ ناقابلِ یقین لمحہ ہے۔