پنجاب یونیورسٹی اور یونیورسٹی آف ایگریکلچر سوات مابین تعلیمی تعاون کے فروغ کا معاہدہ

جمعہ 13 فروری 2026 17:43

لاہور (اُردو پوائنٹ اخبارتازہ ترین - این این آئی۔ 13 فروری2026ء) پنجاب یونیورسٹی اوریونیورسٹی آف ایگریکلچر سوات،خیبر پختونخواہ کے مابین تعلیمی تعاون،تحقیقی اشتراک اور ادارہ جاتی روابط کو مضبوط بنانے کے لیے معاہدہ طے پاگیا۔ اس سلسلے میں مفاہمتی یادداشت پر دستخط کی تقریب پنجاب یونیورسٹی وائس چانسلر آفس میں منعقد ہوئی۔اس موقع پروائس چانسلر پنجاب یونیورسٹی پروفیسرڈاکٹر محمد علی،یونیورسٹی آف ایگریکلچر سوات کے وائس چانسلرپروفیسرڈاکٹرداؤد جان، پنجاب یونیورسٹی کے پرو وائس چانسلرپروفیسرڈاکٹرخالد محمود،ڈائریکٹر ایکسٹرنل لنکجزپروفیسر ڈاکٹر یامینہ سلمان ودیگرنے شرکت کی۔

معاہدے کے تحت دونوں جامعات مشترکہ تحقیقی منصوبوں، اساتذہ اور طلبہ کے تبادلہ پروگرامز، علمی اشاعتوں، نصاب کی تیاری ، مشترکہ کانفرنسز، سیمینارز اور ورکشاپس کے انعقاد میں تعاون کریں گی۔

(جاری ہے)

دونوں جامعات زراعت، ماحولیاتی تبدیلی،ماحولیاتی پائیداری، غذائی تحفظ، دیہی ترقی اور متعلقہ بین الشعبہ جاتی اداروںمیں تحقیق کو بھی فروغ دیں گے۔

اس موقع پرگفتگو کرتے ہوئے وائس چانسلر ڈاکٹر محمد علی نے کہا کہ عصر حاضر کے تعلیمی و سماجی چیلنجز سے نمٹنے کے لیے بین الجامعاتی تعاون نہایت ضروری ہے۔ انہوں نے زور دیا کہ اس نوعیت کی شراکت داری تحقیق کے فروغ، تعلیمی معیار کی بہتری اور طلبہ و اساتذہ کو مشترکہ تجربات اور مہارتوں سے استفادہ کرنے کے مواقع فراہم کرنے میں معاون ثابت ہوگی۔

یونیورسٹی آف ایگریکلچر سوات کے وائس چانسلر ڈاکٹر داؤد جان نے پنجاب یونیورسٹی کے علمی مقام اور تحقیقی خدمات کو سراہتے ہوئے امید ظاہر کی کہ یہ تعاون ابھرتے ہوئے شعبہ جات میں باہمی اشتراک کے نئے دروازے کھولے گا۔یہ مفاہمتی یادداشت دونوں جامعات کے تعلیمی معیار کے فروغ، قومی یکجہتی اور بین الصوبائی سطح پر علم کے تبادلے کے عزم کی عکاسی کرتی ہے۔