گورنر تاشقند کی قیادت میں وفد کی سیکرٹری زراعت پنجاب و سیکرٹری لائیو سٹاک سے ملاقات،زرعی اجناس و ڈیری پراڈکٹس بارے تبادلہ خیال

جمعہ 13 مارچ 2026 21:52

لاہور (اُردو پوائنٹ اخبارتازہ ترین - اے پی پی۔ 13 مارچ2026ء) تاشقند ریجن کے گورنر کی قیادت میں ازبکستان کے اعلیٰ سطحی وفد نے لاہور میں سیکرٹری زراعت پنجاب افتخار علی سہو اور سیکرٹری لائیو سٹاک احمد عزیز تارڑ سے ملاقات کی۔ اس موقع پر ڈائریکٹر جنرل انفارمیشن محکمہ زراعت پنجاب نوید عصمت کاہلوں اور کنسلٹنٹ محکمہ زراعت پنجاب ڈاکٹر محمد انجم علی سمیت دیگر افسران بھی موجود تھے۔

وفد کے دورہ کا مقصد باہمی تجارتی تعلقات کو مزید مستحکم بنانا تھا۔وفد کے شرکاء سے زرعی اجناس و ڈیری پراڈکٹس بارے تفصیلی گفتگو ہوئی۔ اس موقع پر سیکرٹری زراعت پنجاب نے کہا کہ کل ملکی زرعی پیداوار میں پنجاب کا حصہ 70 فیصد سے زائد ہے۔ انہوں نے کہا کہ کپاس، گندم، مکئی، چاول، کماد، آلو، کنو اور آم پنجاب کی اہم فصلیں ہیں۔

(جاری ہے)

افتخار علی سہو نے بتایا کہ گزشتہ ماہ ازبکستان کے صدر نے پاکستان کا دورہ کیا اور پاکستان سے 3 لاکھ ٹن آلو درآمد کرنے میں دلچسپی کا اظہار کیا۔

افتخار علی سہو نے کہا کہ زرعی تحقیق کے شعبہ میں دونوں ممالک کو باہمی تعاون کے وسیع مواقع میسر ہیں، زراعت و لائیو سٹاک کے محکموں اور ازبکستان کی حکومت کے ساتھ مشترکہ ورکنگ گروپ تشکیل دیئے جائیں گے۔ اس ضمن میں ورکنگ گروپس کے لیے ایک جامع ایجنڈا تیار کیا جا رہا ہے جس پر باقاعدگی سے آن لائن میٹنگز منعقد کی جائیں گی۔ افتخار علی سہو نے مزید کہا کہ دوطرفہ بزنس ٹو بزنس تعاون کو بھی بڑھایا جائے گا۔

سیکرٹری لائیو سٹاک پنجاب احمد عزیز تارڑ نے کہا کہ پنجاب ملکی کل پیداوار کا 62 فیصد دودھ پیدا کرتا ہے۔ انہوں نے کہا کہ حلال گوشت اور پولٹری پراڈکٹس کی ازبکستان کو ایکسپورٹ کے حجم میں اضافہ کے امکانات موجود ہیں۔ گورنر تاشقند زوئیرمرزایف(Zoyir Mirzayev) نے کہا کہ پاکستانی چاول کی ازبکستان میں بڑی ڈیمانڈ اور ازبکستان پاکستانی آلو کی بڑی مارکیٹ ہے۔ انہوں نے کہا کہ آج کل ریجنل تنائو کی وجہ سے درآمدی و برآمدی رکاوٹیں درپیش ہیں۔ گورنر تاشقند نے کہا کہ ازبکستان آلو کی کاشت و ریسرچ کیلئے زمین و دیگر وسائل فراہم کرنے کو تیار ہے جبکہ پاکستانی فارمرز کو کیٹل فارمنگ کیلئے ازبک حکومت تعاون کرے گی۔