Live Updates

پیٹرولیم مصنوعات کی قیمتوں میں حالیہ اضافہ محض ایک معاشی فیصلہ نہیں، قادر مگسی

پہلے ہی مہنگائی، بے روزگاری اور معاشی بدحالی کے باعث عوام شدید مشکلات کا شکار ہیں ایسے میں پیٹرول کی قیمتوں میں اضافہ ہر چیز کو مزید مہنگا کر دے گا

جمعہ 3 اپریل 2026 22:20

حیدرآباد(اُردو پوائنٹ اخبارتازہ ترین - این این آئی۔ 03 اپریل2026ء) سندھ ترقی پسند پارٹی کے چیئرمین ڈاکٹر قادر مگسی نے کہا ہے کہ پیٹرولیم مصنوعات کی قیمتوں میں حالیہ اضافہ محض ایک معاشی فیصلہ نہیں، بلکہ یہ عوام پر مزید بوجھ ڈالنے اور ان کے منہ سے نوالہ چھین کر ان کے جینے کے راستے بند کرنے کے مترادف ہے، پہلے ہی مہنگائی، بے روزگاری اور معاشی بدحالی کے باعث عوام شدید مشکلات کا شکار ہیں ایسے میں پیٹرول کی قیمتوں میں اضافہ ہر چیز کو مزید مہنگا کر دے گا، اور اس کا سارا بوجھ غریب اور متوسط طبقے پر پڑے گا۔

ایک بیان میں ڈاکٹر قادر مگسی نے کہا کہ حکمرانوں کو عوام کی کوئی فکر نہیں۔ عوام پر مہنگائی کے نئے طوفان مسلط کیے جا رہے ہیں، جب کہ حکمرانوں کے شاہانہ اخراجات، پروٹوکول، مراعات اور عیاشیوں میں کوئی کمی نہیں کی جا رہی۔

(جاری ہے)

اگر ملک معاشی بحران میں ہے تو پھر اس کا بوجھ صرف عام آدمی ہی کیوں برداشت کری حکمران طبقہ اپنے اخراجات میں کمی لانے کے لیے تیار کیوں نہیں انہوں نے کہا کہ اگر حقیقی سنجیدگی ہو تو حکمران اپنے شاہانہ اخراجات کم کر سکتے ہیں، کرپشن کا خاتمہ کر سکتے ہیں، اور بڑے صنعت کاروں، مالیاتی ٹائیکونز اور مافیا سے ٹیکس وصول کر کے مالی خسارہ کم کر سکتے ہیں، مگر افسوس کہ حکومت ایسا کوئی مثر قدم نہیں اٹھا رہی، ڈاکٹر قادر مگسی نے کہا کہ پیٹرولیم لیوی اور دیگر ٹیکسوں کے نام پر عوام سے ہونے والی لوٹ مار کا سلسلہ اب بند ہونا چاہیے، انہوں نے مطالبہ کیا کہ پیٹرولیم مصنوعات کی نئی بڑھائی گئی قیمتیں فوری طور پر واپس لی جائیں، پیٹرولیم لیوی اور دیگر ناجائز ٹیکسوں کے نام پر عوام سے ہونے والی لوٹ مار بند کی جائے، حکمرانوں کی شاہ خرچیوں اور پروٹوکول میں واضح کمی لائی جائے، اور بڑے مالیاتی ٹائیکونز، صنعتکاروں اور ٹیکس نہ دینے والے طبقات سے حقیقی ٹیکس وصول کر کے معیشت کو سنبھالا جائے۔