علامہ اقبال اوپن یونیورسٹی کی تاریخ میں سب سے زیادہ داخلوں کا ریکارڈ قائم کیا ہے، ریجنل ڈائریکٹر

جمعرات 16 اپریل 2026 14:28

سیالکوٹ (اُردو پوائنٹ اخبارتازہ ترین - اے پی پی۔ 16 اپریل2026ء) ریجنل ڈائریکٹر علامہ اقبال اوپن یونیورسٹی سیالکوٹ حسن صفتیں الحمدللہ نے کہا ہے کہ اس بار سیالکوٹ ریجن نے یونیورسٹی کی تاریخ میں سب سے زیادہ داخلوں کا ریکارڈ قائم کیا ہے جو کہ ایف ایم بی پی پورٹل کے مطابق ایک بڑی کامیابی ہے۔ یہ شاندار کامیابی ٹیم ورک موثر آگاہی مہم بیداری اجتماعی شعور کا نتیجہ ہے، اس مہم میں حصہ لینے والے تمام اساتذہ، فیلڈ اسٹاف ، رضاکار مبارکباد کے مستحق ہیں جنہوں نے عوام میں تعلیم کی اہمیت اجاگر کرنے کے لیے بھرپور کردار ادا کیا۔

ان خیالات کا اظہار انہوں نے علامہ اقبال اوپن یونیورسٹی کے داخلہ مہم کے شاندار اختتام پر منعقدہ تقریب سے خطاب کرتے ہوئے کیا ۔ ریجنل ڈائریکٹر نے مزید کہا کہ علامہ اقبال اوپن یونیورسٹی ملک بھر میں فاصلاتی تعلیم کے فروغ کے لیے اہم کردار ادا کر رہی ہے اور سیالکوٹ ریجن اس مشن کو مزید آگے بڑھانے کے لیے پرعزم ہے۔

(جاری ہے)

انہوں نے اعداد و شمار کے مطابق بتایا کہ یونیورسٹی کے سیالکوٹ ریجن نے اس سمیسٹر میں داخلوں کے حوالے سے تاریخی کامیابی حاصل کی، جہاں ایف ایم بی پی پورٹل کے تحت ریکارڈ تعداد میں طلبہ نے داخلہ لیا۔

یہ نمایاں اضافہ گزشتہ سمیسٹرز کے مقابلے میں نہ صرف بہتر حکمت عملی کا عکاس ہے بلکہ موثر آگاہی مہم، فیلڈ اسٹاف کی محنت اور عوام کے بڑھتے ہوئے تعلیمی شعور کی بھی دلیل ہے۔ اعداد و شمار ظاہر کرتے ہیں کہ شہری و دیہی دونوں علاقوں میں داخلوں کی شرح میں خاطر خواہ اضافہ ہوا جس سے اس بات کی نشاندہی ہوتی ہے کہ فاصلاتی نظام تعلیم کی طرف رجحان تیزی سے بڑھ رہا ہے۔ یہ پیش رفت مستقبل میں تعلیمی فروغ اور شرح خواندگی میں بہتری کے لیے ایک مثبت اشارہ سمجھی جا رہی ہے۔