پیپلز پارٹی عوام کی حقیقی نمائندہ جماعت، حکومت ترقی و خوشحالی کے لیے عملی اقدامات کر رہی ہے، جاوید اقبال بڈھانوی

مظفرآباد(اُردو پوائنٹ اخبارتازہ ترین - این این آئی۔ 30 اپریل2026ء) وزیر خوراک، ٹیوٹا و کے ڈی اے جاوید اقبال بڈھانوی نے کہا ہے کہ پیپلز پارٹی ریاست کے عوام کی حقیقی نمائندہ جماعت ہے جو ہر دور میں عوام کے حقوق کی محافظ رہی ہے، اور موجودہ عوامی حکومت ریاست کے عوام کو ریلیف فراہم کرنے، ترقی کے نئے مواقع پیدا کرنے اور خوشحالی کے سفر کو تیز کرنے کے لیے سنجیدہ اور عملی اقدامات کر رہی ہے۔

میڈیا سے گفتگو کرتے ہوئے انہوں نے کہا کہ اس وقت ریاست میں حقیقی معنوں میں عوامی راج قائم ہے جہاں عوامی حکومت اور وزیر اعظم عوام کی امنگوں کے مطابق فیصلے کر رہے ہیں۔ انہوں نے کہا کہ حکومت کی کارکردگی محض بیانات تک محدود نہیں بلکہ اس کے اثرات عملی طور پر ہر شعبہ زندگی میں نمایاں ہو رہے ہیں۔

(جاری ہے)

ترقیاتی منصوبے تیزی سے مکمل کیے جا رہے ہیں اور عوام کو درپیش مسائل کے حل کے لیے مربوط حکمت عملی کے تحت کام جاری ہے۔

جاوید اقبال بڈھانوی نے کہا کہ پیپلز پارٹی نے ایک مشکل وقت میں ریاست کی باگ ڈور سنبھالی جب بے یقینی، معاشی دبا اور انتظامی چیلنجز اپنے عروج پر تھے۔ ان حالات میں حکومت نے نہ صرف ریاستی معاملات کو سنبھالا بلکہ عوام میں اعتماد بھی بحال کیا اور ترقی و خوشحالی کی بنیاد رکھی۔ انہوں نے کہا کہ آج ریاست درست سمت میں گامزن ہے اور عوام اس کے مثبت اثرات محسوس کر رہے ہیں۔

انہوں نے کہا کہ حکومت کی اولین ترجیح عام آدمی کی فلاح و بہبود ہے جس کے لیے مختلف شعبوں میں جامع اصلاحات اور ترقیاتی منصوبے متعارف کروائے گئے ہیں۔ انفراسٹرکچر کی بہتری، تعلیمی اداروں کی اپ گریڈیشن، صحت کی سہولیات میں اضافہ اور زراعت و صنعت کے فروغ کے لیے ٹھوس اقدامات کیے جا رہے ہیں۔ حکومت کی پالیسیوں کا مقصد صرف وقتی ریلیف نہیں بلکہ پائیدار ترقی کا حصول ہے تاکہ آنے والی نسلوں کے لیے مضبوط بنیاد فراہم کی جا سکے۔

وزیر خوراک نے کہا کہ حکومت عوام کو خود کفیل بنانے کے لیے کاروبار، زراعت، لائیو اسٹاک اور فارمنگ کے شعبوں میں خصوصی توجہ دے رہی ہے۔ چھوٹے اور درمیانے درجے کے کاروبار کو فروغ دینے، کسانوں کو سہولیات فراہم کرنے اور نوجوانوں کو روزگار کے مواقع دینے کے لیے مختلف پروگرامز شروع کیے گئے ہیں۔انہوں نے کہا کہ ریاست کا ہر شہری حکومت کے لیے اہم ہے اور اسی سوچ کے تحت مثر پالیسی سازی کی جا رہی ہے۔

حکومت کا مقصد ایک ایسا نظام قائم کرنا ہے جہاں عوام کو برابری کی بنیاد پر مواقع ملیں اور وہ معاشی طور پر مضبوط ہو سکیں۔نوجوانوں کے حوالے سے گفتگو کرتے ہوئے جاوید اقبال بڈھانوی نے کہا کہ حکومت نوجوان نسل کے مستقبل کو محفوظ بنانے کے لیے بھرپور اقدامات کر رہی ہے۔ ٹیکنیکل اور ووکیشنل ٹریننگ کے اداروں کو فعال بنایا جا رہا ہے تاکہ نوجوانوں کو ہنر مند بنایا جا سکے۔

انہوں نے کہا کہ نوجوان اور خواتین آئی ٹی، ڈیجیٹل اسکلز اور جدید ٹیکنالوجی کے شعبوں میں مہارت حاصل کریں تاکہ وہ عالمی سطح پر بھی اپنی صلاحیتوں کا لوہا منوا سکیں۔انہوں نے کہا کہ حکومت خواتین کو بااختیار بنانے کے لیے بھی خصوصی اقدامات کر رہی ہے تاکہ وہ معاشی سرگرمیوں میں بھرپور کردار ادا کر سکیں۔ خواتین کے لیے ہنر سیکھنے اور کاروبار شروع کرنے کے مواقع فراہم کیے جا رہے ہیں جس سے نہ صرف ان کی زندگیوں میں بہتری آئے گی بلکہ مجموعی معیشت بھی مضبوط ہو گی۔

آخر میں انہوں نے کہا کہ پیپلز پارٹی کی حکومت نے عملی اقدامات کے ذریعے عوام کو ڈیلیور کیا ہے اور اسی وجہ سے عوام کا اعتماد بحال ہو رہا ہے۔ حکومت کا ویژن ایک مضبوط، خود کفیل اور خوشحال ریاست کا قیام ہے جہاں ہر فرد کو ترقی کے مساوی مواقع میسر ہوں، نوجوانوں کو روزگار حاصل ہو، کسان خوشحال ہوں اور کاروباری طبقہ ترقی کرے۔