میڈیا کی ترقی کے لیے تمام وسائل بروئے کار لائیں گے، جدید تقاضوں سے ہم آہنگی ناگزیر ہے، سیکرٹری اطلاعات آزاد کشمیر راشد حنیف

جمعرات 30 اپریل 2026 22:32

مظفرآباد(اُردو پوائنٹ اخبارتازہ ترین - این این آئی۔ 30 اپریل2026ء) آزاد کشمیر کے سیکرٹری اطلاعات راشد حنیف نے کہا ہے کہ حکومت میڈیا کی ترقی کے لیے تمام وسائل بروئے کار لائے گی۔ دنیا میں بدلتے ہوئے حالات کا تقاضا ہے کہ ڈیجیٹل، سوشل، الیکٹرانک اور پرنٹ میڈیا میں جدت لانے کے لیے مثر اقدامات کیے جائیں۔ان خیالات کا اظہار انہوں نے سینٹرل پریس کلب مظفرآباد کے صدر سہیل مغل اور سیکرٹری جنرل شہزاد لولابی سے گفتگو کرتے ہوئے کیا۔

انہوں نے کہا کہ سینٹرل پریس کلب مظفرآباد آزاد کشمیر کا سب سے بڑا صحافتی ادارہ ہے اور حکومت ادارے کی تجاویز کا خیر مقدم کرے گی۔سیکرٹری اطلاعات نے کہا کہ تحریک آزادی کشمیر، خطے کی تعمیر و ترقی، ہنر مندی کے فروغ اور عوامی مسائل کا حل حکومت آزاد کشمیر کی ترجیحات میں شامل ہے۔

(جاری ہے)

انہوں نے کہا کہ اوورسیز کانفرنس، زرعی کانفرنس اور جاب فیسٹیول جیسے تاریخی اقدامات سے ترقی کی نئی راہیں کھلیں گی۔

انہوں نے مزید کہا کہ محکمہ اطلاعات کو جدید تقاضوں سے ہم آہنگ کرتے ہوئے میڈیا کو سہولیات فراہم کی جا رہی ہیں اور اس سلسلے میں مختلف شعبہ جات کام کر رہے ہیں۔ ڈیجیٹل میڈیا کے حوالے سے مثر پالیسی ترتیب دی جائے گی، جس کے لیے ذمہ دارانہ کردار ادا کرنا ضروری ہے کیونکہ دشمن ہماری کسی بھی کمزوری سے فائدہ اٹھانے کی تاک میں رہتا ہے۔راشد حنیف نے کہا کہ ہمارے صحافتی اداروں نے ہمیشہ قومی وقار کو مقدم رکھا ہے۔

انہوں نے کہا کہ آزاد کشمیر میں سیاحت، معدنیات اور توانائی سمیت مختلف شعبوں میں ترقی کے وسیع مواقع موجود ہیں جن سے مرحلہ وار استفادہ کیا جا رہا ہے جبکہ بیرونی سرمایہ کاری کے فروغ کے لیے بھی حکومت کی کوششیں جاری ہیں۔اس موقع پر سینٹرل پریس کلب مظفرآباد کے صدر سہیل مغل اور سیکرٹری جنرل شہزاد لولابی نے سیکرٹری اطلاعات اور حکومت کی جانب سے میڈیا اور صحافتی اداروں کے ساتھ رابطوں کے فروغ کے لیے کی جانے والی کاوشوں کو سراہا۔