وائس چانسلر اسلامیہ یونیورسٹی بہاولپورکی ہدایت پر معرکہ حق بنیان المرصوص کی پندرہ روزہ تقریبات جاری ہیں

پیر 4 مئی 2026 19:26

بہاول پور (اُردو پوائنٹ اخبارتازہ ترین - اے پی پی۔ 04 مئی2026ء) وائس چانسلر اسلامیہ یونیورسٹی بہاول پورپروفیسر ڈاکٹر محمد کامران کی ہدایت پر معرکہ حق بنیان المرصوص کی پندرہ روزہ تقریبات جاری ہیں ۔شعبہ پاکستان اسٹڈیزاسلامیہ یونیورسٹی بہاول پور کے زیرِ اہتمام آج بنیان المرصوص کے موضوع پر ایک اہم علمی و فکری سیمینار کا انعقاد کیا گیا۔ اس سیمینار کا مقصد طلبہ و طالبات میں قومی یکجہتی، فکری شعور اور موجودہ حالات کے تناظر میں اجتماعی ذمہ داری کے احساس کو اجاگر کرنا تھا۔

سیمینار کے مہمانِ خصوصی و مقرر، فخر بلال ایسوسی ایٹ پروفیسر، شعبہ تاریخ، قائداعظم یونیورسٹی، اسلام آبادتھے، جنہوں نے اپنے خطاب میں بنیان المرصوص کے مفہوم، اس کی تاریخی و فکری اہمیت اور موجودہ قومی تناظر میں اس کے عملی اطلاق پر تفصیل سے روشنی ڈالی۔

(جاری ہے)

انہوں نے شرکاء کو بتایا کہ یہ تصور محض ایک اصطلاح نہیں بلکہ اتحاد، استحکام اور اجتماعی طاقت کی علامت ہے، جو کسی بھی قوم کو مضبوط بنیاد فراہم کرتی ہے۔

تقریب میں اساتذہ کرام، ریسرچ اسکالرز اور طلبہ کی بڑی تعداد نے شرکت کی اور موضوع سے بھرپور استفادہ حاصل کیا۔ مقررین نے اس بات پر زور دیا کہ قومی اتحاد اور یکجہتی ہی وہ قوت ہے جو پاکستان کو درپیش چیلنجز سے نمٹنے میں کلیدی کردار ادا کر سکتی ہے۔تقریب کے اختتام پر چیئرپرسن شعبۂ پاکستان اسٹڈیز، روبینہ یاسمین نے مہمانِ خصوصی، اساتذہ اور طلبہ کا شکریہ ادا کرتے ہوئے کہا کہ ایسے علمی پروگرامز کا انعقاد طلبہ کی فکری تربیت اور قومی شعور کی بیداری کے لیے نہایت ضروری ہے۔

اس سیمینار کی نظامت کے فرائض آصف عثمان لیکچرر، شعبۂ پاکستان اسٹڈیزنے بخوبی انجام دیے، جنہوں نے پروگرام کو احسن انداز میں آگے بڑھایا۔یہ سیمینار علمی و فکری حوالے سے نہایت کامیاب رہا اور شرکاء نے اسے ایک بامقصد اور مؤثر کاوش قرار دیا۔