سپورٹس بورڈ پنجاب کا کھیلوں کے فروغ کیلئے16 سپورٹس اکیڈیمز اوپن کرنے کا اعلان

بدھ 6 مئی 2026 20:42

لاہور (اُردو پوائنٹ اخبارتازہ ترین - اے پی پی۔ 06 مئی2026ء) ڈائریکٹر جنرل سپورٹس پنجاب محمد طارق قریشی نے پنجاب میں کھیلوں کے فروغ کیلئے ایک اہم قدم اٹھاتے ہوئے 16 مختلف سپورٹس اکیڈیمز کھولنے کا اعلان کیا ہے۔ یہ اعلان انہوں نے نیشنل ہاکی سٹیڈیم میں بدھ کے روز پنجاب کے تمام کوچز کے اہم اجلاس کی صدارت کرتے ہوئے کیا۔ ڈائریکٹرجنرل محمد طارق قریشی نے اجلاس سے خطاب کرتے ہوئے کہا ہے کہ ملکی تاریخ میں پہلی بار 16 سپورٹس اکیڈیمز کو کھلاڑیوں کیلئے فری اوپن کیا جا رہا ہے تاکہ ٹیلنٹ کو سامنے لایا جا سکے اور نوجوانوں کو کھیلوں کی بہترین سہولیات فراہم کی جا سکیں۔

یہ اکیڈیمز گرلز اینڈ بوائز دونوں کیلئے ہوں گی اور ہر شہری کو کھیلوں کے مواقع فراہم کرنا سپورٹس بورڈ پنجاب کی ترجیح ہے۔

(جاری ہے)

ڈی جی سپورٹس پنجاب نے مزید کہا کہ یہ اکیڈیمز پنجاب کے تمام ڈویژنز اور اضلاع میں قائم کی جائیں گی، باکسنگ، اتھلیٹکس، سوئمنگ، ٹیبل ٹینس، بیڈمنٹن، فٹ بال، ہاکی، آرچری، ووشو، کراٹے، جوجِٹسو، تائیکوانڈو، ٹینس، سکواش، کرکٹ اورلیز رن کی اکیڈیمز قائم کی جائیں گی، ان اکیڈیمز کا جلد افتتاح کردیا جائے گا۔

سپورٹس اکیڈیمز کا مقصد نوجوان کھلاڑیوں کو معیاری کوچنگ فراہم کرنا ہے جو کہ بالکل فری ہوں گی اورملکی تاریخ میں پہلی بار سپورٹس کی ترقی کیلئے ایسے اقدامات اٹھائے جارہے ہیں۔اجلاس میں ڈائریکٹر سپورٹس چاند پروین، ڈپٹی ڈائریکٹر ظہور احمد اور دیگر افسران نے بھی شرکت کی ہے۔