خانیوال، وزیراعلی کی ہدایت پر معرکہ حق کی تقریبات شایان شان انداز میں منانے کا فیصلہ

بدھ 6 مئی 2026 20:45

خانیوال(اُردو پوائنٹ اخبارتازہ ترین - این این آئی۔ 06 مئی2026ء) وزیراعلی پنجاب مریم نواز کی ہدایت پر معرکہ حق کی ایک سالہ تقریبات ضلع خانیوال میں شایانِ شان انداز میں منانے کا فیصلہ کیا گیا ہے۔ ضلعی انتظامیہ کے زیر اہتمام مرکزی تقریب 10مئی کو ضلع کونسل ہال خانیوال میں منعقد ہوگی۔اس سلسلے میں ڈپٹی کمشنر ملیحہ رشید کی زیر صدارت اجلاس منعقد ہوا، جس میں اسسٹنٹ کمشنرز، چیف آفیسرز میونسپل کمیٹیز اور مختلف محکموں کے سربراہان نے شرکت کی۔

اجلاس میں تقریبات کے جامع پلان کا تفصیلی جائزہ لیا گیا اور متعلقہ افسران کو واضح ذمہ داریاں سونپی گئیں۔ڈپٹی کمشنر نے ہدایت کی کہ سول سوسائٹی، شہریوں اور طلبہ کی بھرپور شرکت یقینی بنائی جائے تاکہ تقریبات قومی جوش و جذبے کے ساتھ منائی جا سکیں۔

(جاری ہے)

انہوں نے کہا کہ تقریبات میں پاک فوج کی قربانیوں، لازوال کامیابیوں اور دشمن کی شکست کو اجاگر کیا جائے گا۔

انہوں نے مزید ہدایت کی کہ شہروں میں بینرز، فلیکسز اور ہورڈنگ بورڈز نمایاں طور پر آویزاں کیے جائیں، جبکہ تحصیل سطح پر تقریبات کی قیادت اسسٹنٹ کمشنرز کریں گے۔دریں اثنا، حکومت پنجاب کی ہدایت پر نہم جماعت کے امتحانات میں شفافیت یقینی بنانے اور سرکاری سکولوں میں تعلیمی سہولیات کی بہتری کے لیے کڑی مانیٹرنگ جاری ہے۔ ڈپٹی کمشنر ملیحہ رشید نے گورنمنٹ ماڈل ہائیر سیکنڈری سکول اور گرلز ہائیر سیکنڈری سکول پیرووال کا دورہ کیا، جہاں انہوں نے امتحانی سنٹرز، انتظامات اور سہولیات کا جائزہ لیا۔

انہوں نے کلاس رومز میں روشنی اور دیگر بنیادی سہولیات مزید بہتر بنانے کی ہدایت کی اور داخلہ مہم کا بھی جائزہ لیا۔ طلبہ سے گفتگو کے دوران انہیں تعلیم جاری رکھنے کی تلقین کی گئی۔ڈپٹی کمشنر نے متعلقہ افسران کو ہدایت کی کہ داخلہ مہم کے 100فیصد اہداف ہر صورت حاصل کیے جائیں تاکہ کوئی بھی بچہ تعلیم سے محروم نہ رہے۔ انہوں نے کہا کہ وزیراعلی پنجاب تعلیم کے شعبے پر خصوصی توجہ دے رہی ہیں اور سرکاری سکول معیاری تعلیم فراہم کر رہے ہیں، اس لیے والدین اپنے بچوں کے داخلے سرکاری سکولوں میں یقینی بنائیں۔