بانی حکم کریں تو پورا پاکستان بند کر دیں

عمران خان کے حکم کے بغیر نہ کسی کی بات سنوں گا اور نہ مانوں گا،میرا لیڈر عمران خان ہے میں اس کے ہر حکم کی تعمیل کروں گا، وزیر اعلٰی سہیل آفریدی کا اعلان

محمد علی بدھ 6 مئی 2026 20:10

مانسہرہ (اُردو پوائنٹ اخبارتازہ ترین۔ 06 مئی2026ء) سہیل آفریدی کا کہنا ہے کہ بانی حکم کریں تو پورا پاکستان بند کر دیں، عمران خان کے حکم کے بغیر نہ کسی کی بات سنوں گا اور نہ مانوں گا،میرا لیڈر عمران خان ہے میں اس کے ہر حکم کی تعمیل کروں گا۔ بدھ کے روز مانسہرہ میں جلسہ عام سے خطاب کرتے ہوئے وزیر اعلٰی خیبرپختونخواہ سہیل آفریدی نے کہا کہ 180 نشستیں جیتنے والے شخص کو قید کیا گیا، 17 نشستیں جیتنے والوں کو ہم پر مسلط کیا گیا، جب تک ہم اپنے حق کے لیے کھڑے نہیں ہونگے تب تک ہم ہر ظلم و جبر کرتے رہیں گے۔

سہیل آفریدی نے کہا کہ ہم نے متحد ہوکر اپنے حقوق کی جنگ لڑنی ہے، ہم نے عمران خان کے نظریے پر اپنی جانیں قربان کی ہیں ، ان کو تکلیف میں دیکھ کر درد ہوتا ہے۔ انہوں نے کہا کہ بیرسٹر سلمان صفدر کے ذریعے عمران خان کو پیغام بھیجا کہ میں بھی تیار ہوں اور قوم بھی تیار ہے ، حکم کریں تو پورا پاکستان بند کر دیں، میرا لیڈر عمران خان ہے میں اس کے ہر حکم کی تعمیل کروں گا۔

(جاری ہے)

سہیل آفریدی کا کہنا تھا کہ عمران خان کے حکم کے بغیر نہ کسی کی بات سنوں گا اور نہ مانوں گا، جب میری نامزدگی کا اعلان ہوا تو طرح طرح کے الزامات لگائے گئے لیکن میں ڈٹا رہا، جب ناکام ہوئے تو میرے آبائی علاقے میں آپریشن کا اعلان کیا گیا۔ وزیراعلیٰ خیبرپختونخوا نے کہا کہ میرے لوگ میرے ساتھ کھڑے ہیں، وہ جانتے ہیں انکے ووٹ پر کس نے ڈاکہ ڈالا، جزیرے کون خریدتا ہے، میں اپنے لیڈر اور لیڈر کی پارٹی کو کبھی نقصان نہیں پہنچاؤں گا، تمام آئینی وقانونی راستے عمران خان سے ملاقات کے لیے استعمال کر چکے۔

عمران خان اور انکی اہلیہ کا ذاتی معالجین و فیملی کی موجودگی میں علاج نہیں کرایا جا رہا، جب سارے رستے بند کر دیئے جائیں ، دیوار سے لگایا جائے ، تو ہمارے پاس صرف احتجاج کا راستہ بچتا ہے۔ سہیل آفریدی کا کہنا تھا کہ ہم نے ایک دوسرے کی طاقت بن کر کندھے سے کندھا ملا کر انہیں شکست دینی ہے، ایلیٹ مافیا کبھی بھی نہیں چاہے گا مڈل کلاس آگے آئے، عمران خان نے پہلی دفعہ ایک مڈل کلاس لڑکے کو وزارت اعلیٰ کی کرسی پر بٹھایا ہے۔ آپ سے وعدہ کرتا ہوں عمران خان اور عوام کے اعتماد کو ٹھیس نہین پہنچاؤں گا۔