یوٹیوبر رجب بٹ کو پولیس پروٹوکول دینے کے خلاف درخواست سماعت کیلئے مقرر

ہفتہ 9 مئی 2026 17:12

لاہور (اُردو پوائنٹ اخبارتازہ ترین - این این آئی۔ 09 مئی2026ء) لاہورہائیکورٹ میں یوٹیوبررجب بٹ کو عدالت پیشی کے موقع پر پولیس پروٹوکول فراہم کرنے کے خلاف دائر درخواست سماعت کے لئے مقرر کر دی گئی۔ہائی کورٹ رجسٹرار آفس کی جانب سے جاری کاز لسٹ کے مطابق کیس کی سماعت 11مئی کو ہوگی۔ درخواست پر سماعت جسٹس طارق سلیم شیخ کریں گے۔

(جاری ہے)

درخواست شہری پلوشہ عبدالحد کی جانب سے دائر کی گئی ہے، جس میں موقف اختیار کیا گیا کہ ایک سوشل میڈیا شخصیت کو سرکاری وسائل استعمال کرتے ہوئے پولیس پروٹوکول فراہم کرنا اختیارات کے غلط استعمال کے مترادف ہے۔

عدالت نے پہلے ہی فریقین سے جواب طلب کر رکھا ہے۔ درخواست میں پنجاب پولیس کے انسپکٹر جنرل پنجاب، ڈی آئی جی سکیورٹی اور رجب بٹ کو فریق بنایا گیا ہے۔درخواست گزار نے عدالت سے استدعا کی ہے کہ غیر ضروری پروٹوکول اور سرکاری وسائل کے استعمال سے متعلق پالیسی واضح کی جائے اور قانون کے مطابق کارروائی عمل میں لائی جائے۔