ڈپٹی کمشنر مظفر آباد کی زیر صدارت اجلاس، اشیائے ضروریہ کی قیمتوں ،معیار یقینی بنانے سے متعلق امور پر غور

منگل 12 مئی 2026 19:46

مظفرآباد (اُردو پوائنٹ اخبارتازہ ترین - این این آئی۔ 12 مئی2026ء) ڈپٹی کمشنر مظفرآباد منیر احمد قریشی کی زیر صدارت پرائس کنٹرول کمیٹی کا اہم اجلاس منعقد ہوا، جس میں ضلع بھر میں اشیائے ضروریہ کی قیمتوں اور معیار کو یقینی بنانے سے متعلق امور پر تفصیلی غور کیا گیا۔

(جاری ہے)

اجلاس میں ایڈیشنل ڈپٹی کمشنر حسام خورشید، صدر سنٹرل پریس کلب سہیل مغل، صدر سول سوسائٹی راجہ آفتاب، ڈسٹرکٹ فوڈ کنٹرولر ابرار احمد میر، ڈپٹی ڈائریکٹر لائیو سٹاک، ڈپٹی ڈائریکٹر زراعت سمیت محکمہ انڈسٹری، کامرس، لیبر ویلفیئر اور اوزان و پیمائش کے نمائندگان اور دیگر متعلقہ افسران نے شرکت کی۔

اجلاس کے دوران دارالحکومت مظفرآباد میں چکن اور ایل پی جی کے نرخوں، ٹرانسپورٹ کے کرایہ نامے، روٹی اور باقرخانی کے وزن اور معیار سمیت دیگر اہم امور کا جائزہ لیا گیا۔ اس موقع پر تمام متعلقہ محکموں اور سٹیک ہولڈرز کی باہمی مشاورت سے مختلف فیصلے کیے گئے تاکہ عوام کو معیاری اشیاء مناسب نرخوں پر فراہم کی جا سکیں۔ڈپٹی کمشنر نے متعلقہ اداروں کو ہدایت کی کہ مقررہ نرخوں اور معیار پر سختی سے عملدرآمد یقینی بنایا جائے اور خلاف ورزی کرنے والوں کے خلاف قانونی کارروائی عمل میں لائی جائے، تاکہ عوام کو ریلیف فراہم کیا جا سکے۔