ٓنوجوانوں میں سچائی کے فروغ اور جھوٹی خبروں کی روک تھام کے لیے تربت یونیورسٹی میں اہم سیشن

- نوجوان کسی بھی خبر کی تشہیر سے قبل اس کی تصدیق یقینی بنائیں،عبداللہ حمید گل کا خطاب

بدھ 13 مئی 2026 20:55

تربت (اُردو پوائنٹ اخبارتازہ ترین - آن لائن۔ 13 مئی2026ء) تربت یونیورسٹی میں ڈائریکٹوریٹ آف اسٹوڈنٹس افیئرز کے زیراہتمام سچائی کے فروغ اور پروپیگنڈہ و جھوٹی خبروں کے سدباب میں نوجوانوں کے کردار کے عنوان پر ایک آن لائن سیشن کا انعقاد کیا گیا۔اس سیشن میں تربت یونیورسٹی کے علاوہ بلوچستان یونیورسٹی آف انجینئرنگ اینڈ ٹیکنالوجی خضدار کے مین کیمپس اور تربت سب کیمپس، لسبیلہ یونیورسٹی آف ایگریکلچر، واٹر اینڈ میرین سائنسز اوتھل، گوادر یونیورسٹی اور یونیورسٹی آف مکران پنجگور کے اساتذہ، انتظامی عملے اور طلبہ نے ویڈیو لنک کے ذریعے شرکت کی۔

معروف دانشور، سماجی و سیاسی شخصیت اور ممتاز مقرر محمد عبداللہ حمید گل نے بطور ریسورس پرسن ویڈیو لنک کے ذریعے سیشن میں شرکت کی، جبکہ تربت یونیورسٹی کے ڈائریکٹر پبلک ریلیشنز اعجاز احمد نے نظامت کے فرائض انجام دیے۔

(جاری ہے)

اس موقع پر رجسٹرار گنگزار بلوچ، ڈائریکٹر اسٹوڈنٹس افیئرز چاکر حیدر، اساتذہ کرام، انتظامی عملہ اور طلبہ نے بھی شرکت کی۔

اپنے خطاب میں مرکزی مقرر محمد عبداللہ حمید گل نے کہا کہ نوجوان معاشرے میں سچائی کے علمبردار اور امن کے سفیر ہوتے ہیں۔ انہوں نے عالمی و علاقائی صورتحال، خطے کو درپیش چیلنجز اور عالمی سطح پر پاکستان کے بڑھتے ہوئے کردار پر بھی اظہار خیال کیا۔ انہوں نے نوجوانوں پر زور دیا کہ وہ کسی بھی خبر کو آگے بڑھانے سے قبل اس کی تصدیق ضرور کریں۔

انہوں نے شرکا کی جانب سے بلوچستان، علاقائی اور عالمی امور سے متعلق پوچھے گئے سوالات کے جامع اور مدلل جوابات بھی دیے۔سیشن کے اختتام پر تربت یونیورسٹی کے وائس چانسلر پروفیسر ڈاکٹر گل حسن کی جانب سے ڈائریکٹر پبلک ریلیشنز نے مہمان خصوصی محمد عبداللہ حمید گل اور تمام شریک جامعات کے اساتذہ، انتظامیہ اور طلبہ کا سیشن میں شرکت کرنے پر شکریہ ادا کیا