بنگلہ دیشی ہائی لیول وفد کا ریسکیوہیڈ کوارٹر کا دورہ، جدید ایمرجنسی نظام کی تعریف

جمعرات 14 مئی 2026 19:50

لاہور (اُردو پوائنٹ اخبارتازہ ترین - اے پی پی۔ 14 مئی2026ء) بنگلہ دیش کے سینئر افسران پر مشتمل ایک اعلی سطحی وفد نے ریسکیو 1122 پنجاب کے ہیڈکوارٹر اور ایمرجنسی سروسز اکیڈمی کا دورہ کیا۔ وفد کی قیادت بنگلہ دیش کی سینئر سیکریٹری سلمی صدیقہ مہتاب کر رہی تھیں۔ترجمان ریسکیو پنجاب کے مطابق سیکرٹری ایمرجنسی سروسز ڈیپارٹمنٹ ڈاکٹر رضوان نصیر نے وفد کا استقبال کیا اور ریسکیو 1122کے قیام، جدید ایمرجنسی ریسپانس سسٹم، تربیتی معیار اور عوامی خدمت کے مختلف پہلوئوں پر تفصیلی بریفنگ دی۔

بریفنگ کے دوران ڈاکٹر رضوان نصیر نے بتایا کہ ریسکیو 1122نے پنجاب بھر میں ایمرجنسی سروسز کی فراہمی، ڈیزاسٹر مینجمنٹ، فائر ریسکیو، میڈیکل ایمرجنسی اور کمیونٹی سیفٹی کے شعبوں میں نمایاں کامیابیاں حاصل کی ہیں۔

(جاری ہے)

بنگلہ دیشی وفد نے ریسکیو 1122کے جدید ایمرجنسی سروسز ریفارمز، مربوط نظام اور پیشہ ورانہ اندازِ کار میں گہری دلچسپی کا اظہار کیا۔

وفد نے ایمرجنسی سروسز اکیڈمی میں قائم تربیتی سٹالز، عملی مشقوں اور ریسکیورز کی پیشہ ورانہ تربیت کو بھی سراہا۔ترجمان کے مطابق وفد نے بلند و بالا عمارات میں بلڈنگ سیفٹی کوڈز اور ایمرجنسی رسپانس میکانزم کے حوالے سے بھی مشاورت کی اور پنجاب میں نافذ جدید حفاظتی اقدامات کو قابلِ تعریف قرار دیا۔دورے کے اختتام پر دونوں ممالک کے حکام نے ایمرجنسی سروسز، تربیتی تعاون اور ڈیزاسٹر مینجمنٹ کے شعبے میں باہمی روابط مزید مضبوط بنانے کے عزم کا اظہار کیا۔