Live Updates

ایران، امریکا کی اندرونی سیاست کااستعمال کرکے بڑی ڈیل پر مجبور نہیں کرسکتا

امریکا ایران معاملے پر چین سے مدد نہیں مانگ رہا، چین آبنائے ہرمز کو عسکریت کا مرکز بنانے اور ٹیکس لگانے کے خلاف ہے امریکا کا بھی یہی مئوقف ہے۔ امریکی وزیرخارجہ کی امریکی چینل سے گفتگو

ثنااللہ ناگرہ جمعرات 14 مئی 2026 21:35

ایران، امریکا کی اندرونی سیاست کااستعمال کرکے بڑی ڈیل پر مجبور نہیں ..

واشنگٹن (اردوپوائنٹ اخبار تازہ ترین۔ انٹرنیشنل پریس ایجنسی ۔ 14 مئی 2026ء ) امریکی وزیرخارجہ مارکو روبیونے کہا ہے کہ چین پر واضح کردیا کہ تائیوان مسئلے پر امریکی پالیسی میں کوئی تبدیلی نہیں آئی۔ امریکی وزیرخارجہ نے امریکی چینل سے گفتگو میں کہا کہ ٹرمپ کی چینی ہم منصب سے ملاقات میں تائیوان مسئلے پر بات ہوئی ہے، تائیوان پر امریکی پالیسی میں کوئی تبدیلی نہیں آئی ۔

تائیوان سے متعلق امریکا نے چین پر اپنا مئوقف واضح کردیا ہے، چینی صدر نے کہا کہ چین سے تائیوان کا دوبارہ الحاق ناگزیر ہے۔ امریکا کا ماننا ہے کہ طاقت کے ذریعے اس مقصد کا حصول خوفناک غلطی ہوگی۔امریکی وزیرخارجہ نے کہا کہ امریکا ایران کے معاملے پر چین سے مدد نہیں مانگ رہا، امریکا کو ایران کے معاملے پر چین کی مدد کی ضرورت بھی نہیں۔

(جاری ہے)

چینی فریق نے کہا کہ چین بھی آبنائے ہرمز کو عسکریت کا مرکز بنانے کے حق میں نہیں ، چین آبنائے ہرمز میں ٹول ٹیکس لگانے کے خلاف ہے یہ امریکا کا مئوقف ہے۔

ٹرمپ نے واضح کیا کہ ایران، امریکا کی اندرونی سیاست کا استعمال کرکے بڑی ڈیل پر مجبور نہیں کرسکتا۔ صدر ٹرمپ نے فاکس نیوز سے گفتگو میں کہا کہ یہ واضح ہے کہ آبنائے ہرمز کھولنے میں چین کی بڑی دلچسپی ہے، چینی صدر آبنائے ہرمز کو کھلا دیکھنا چاہتے ہیں ،چینی صدر نے آبنائے ہرمز کے حوالے سے مدد کی پیشکش کی ہے۔ مزید برآں چین کے دارالحکومت بیجنگ میں امریکی اور چینی صدور کے درمیان خوشگوار ماحول میں ملاقات ہوئی جس میں صدر شی جن پنگ نے کہا ہے کہ چین اور امریکا کو ایک دوسرے کا حریف بننے کی بجائے شراکت دار بننا چاہیے، دونوں ممالک کو ایک دوسرے کی کامیابی اور خوشحالی میں مدد کرنی چاہیے اور نئے دور میں ایک دوسرے کے ساتھ اچھے طریقے سے چلنے کا صحیح راستہ تلاش کرنا چاہیے ،امریکی صدر ڈونلڈ ٹرمپ نے کہا ہے کہ امریکا اور چین کے تعلقات پہلے سے کہیں زیادہ بہتر ہوں گے اور وہ اپنے ساتھ دنیا کے بہترین کاروباری رہنماؤں کو لے کر آئے ہیں۔

شنہوا کے مطابق چین کے صدر شی جن پنگ اور ان کے امریکی ہم منصب ڈونلڈ ٹرمپ کی ملاقات جمعرات کی صبح بیجنگ کے گریٹ ہال آف دی پیپل میں ہوئی۔ نیوزایجنسی کے مطابق چین کے صدر شی جن پنگ نے کہا کہ دنیا میں رونما ہونے تبدیلیوں کی رفتار اس قدر تیز ہو چکی ہے جو گزشتہ ایک صدی کے دوران نہیں دیکھی گئی، بین الاقوامی صورتحال تیزی سے بدلتی ہوئی اور ہنگامہ خیز ہے، دنیا ایک دوراہے پر آچکی ہے ۔