نئی دلی، مسلم اکثریتی جیت پور میں بلڈوزر کارروائی، متعدد گھر مسمارکردئیے گئے

جمعہ 15 مئی 2026 14:10

نئی دلی(اُردو پوائنٹ اخبارتازہ ترین - این این آئی۔ 15 مئی2026ء) بھارتی دارالحکومت نئی دلی کے مسلم اکثریتی علاقے جیت پور کی کھڈا کالونی میں بلڈوزر کارروائی کے دوران متعدد مکانات مسمار کر دیے گئے، جس کے باعث سینکڑوں افراد متاثر ہوئے اور علاقے میں خوف و ہراس کی فضا قائم ہوگئی۔کشمیرمیڈیاسروس کے مطابق بدھ کی صبح پولیس کی بھاری نفری اور انتظامیہ کے اعلیٰ حکام کی موجودگی میں بلڈوزر کارروائی شروع کی گئی۔

دیکھتے ہی دیکھتے کئی عمارتیں ملبے کے ڈھیر میں تبدیل ہوگئیں جبکہ متاثرہ خاندان اپنی جمع پونجی اور گھروں کو تباہ ہوتے دیکھتے رہے ۔علاقہ مکینوں کا کہنا ہے کہ گزشتہ ایک ہفتے سے انتظامیہ کی نقل و حرکت میں اضافہ دیکھا جا رہا تھا، جس کے بعد لوگوں کو کسی بڑے کریک ڈائون کا خدشہ پیدا ہوگیا تھا۔

(جاری ہے)

کارروائی کے دوران پورا علاقہ پولیس چھائونی کا منظر پیش کرتا رہا۔

متاثرہ خاندانوں نے الزام عائد کیاہے کہ حکومت غریب اور کمزور طبقے کے گھروں کو نشانہ بنا رہی ہے۔ ایک متاثرہ خاتون نے روتے ہوئے بتایا کہ اس نے برسوں کی محنت اور بچت سے اپنا گھر تعمیر کیا تھا، لیکن اب وہ نہیں جانتی کہ اپنے اہلخانہ کو کہاں لے کر جائے۔دوسری جانب انتظامیہ کا موقف ہے کہ کارروائی صرف غیر قانونی تعمیرات کے خلاف کی گئی ہے اور کسی زیرِ قبضہ رہائشی مکان کو نقصان نہیں پہنچایا گیا۔

تاہم مقامی افراد نے اس دعوے کو مسترد کرتے ہوئے کہا کہ کئی خاندان بے گھر ہو چکے ہیں۔یاد رہے کہ نئی دلی میں ہندوتوا بھارتیہ جنتا پارٹی کی حکومت قائم ہونے کے بعد مختلف مسلم آبادی والے علاقوں میں بلڈوزر کارروائیوں کے خدشات میں اضافہ دیکھا جا رہا ہے، جس پر اپوزیشن جماعتیں حکومت کو کڑی تنقید کا نشانہ بنا رہی ہیں۔