گورنر و وزیراعلی خیبر پختونخوا کی خطے کی ترقی میں آغا فائونڈیشن کے کردار کی تعریف

مستقبل میں تعاون کو مزید وسعت دینے کی خواہش کا اظہار

پیر 25 مئی 2026 19:50

چترال (اُردو پوائنٹ اخبارتازہ ترین - این این آئی۔ 25 مئی2026ء) گورنر خیبر پختونخوا فیصل کریم کنڈی اور وزیر اعلی سہیل افریدی نے خطے کی ترقی میں آغا خان فائونڈیشن کے کردار کو سراہتے ہوئے مستقبل میں تعاون کو مزید وسعت دینے کی خواہش کا اظہار کیا ہے۔چترال ائیرپورٹ پر پرنس رحیم آغا خان کو گرم چشمہ کے دورے کے بعد رخصت کرنے کے موقع پر میڈیا سے گفتگو کرتے ہوئے صوبائی قیادت نے کہا کہ انہوں نے عزت مآب کے ساتھ خیبر پختونخوا میں مائنز اینڈ منرلز، قدرتی وسائل اور ہاسپیٹلٹی(سیاحت و مہمان نوازی)کے شعبوں میں موجود وسیع مواقع پر تفصیلی گفتگو کی ہے۔

چترال ائر پورٹ میں میڈیاسے گفتگوکرتے ہوئے انہوں نے کہا کہ بہت سے ایسے شعبے موجود ہیں جہاں آغا خان فانڈیشن حکومت کے ساتھ مل کر کام کر سکتی ہے۔

(جاری ہے)

انہوں نے کہاکہ پرنس رحیم آغا خان نے پشاور میں آغا خان یونیورسٹی اور ہسپتال کے قیام پر اصولی اتفاق کیا ہے۔ چترال میں آغا خان فانڈیشن کی طرف سے انجام دی گئی ترقیاتی کاموں کی تعریف کرتے ہوئے گورنر اور وزیر اعلی نے صوبے کے پسماندہ علاقوں کی ترقی میں فانڈیشن کی خدمات کو خراج تحسین پیش کیا۔انہوں نے کہاکہ پرنس رحیم آغا خان کی طرف سے انہیں یقین دہانی کرائی گئی کہ صوبائی حکومت کے ساتھ ایک مربوط تعلق کار قائم کیا جائے گا جوکہ اس علاقے سے پسماندگی کے خاتمے میں مدد گار ثابت ہوگا۔