پاکستان ,آسٹریلیا کے درمیان دوسرا ون ڈے کل قذافی سٹیڈیم میں کھیلا جائے گا

لاہور (اُردو پوائنٹ اخبارتازہ ترین - اے پی پی۔ 02 جون2026ء) پاکستان اور آسٹریلیا کے درمیان ون ڈے سیریز کا دوسرا مقابلہ منگل کو لاہور کے قذافی اسٹیڈیم میں شام ساڑھے چار بجے کھیلا جائے گا ٹاس چار بجے ہوگا جسکے لئے تمام تر تیاریاں مکمل کرلی گئیں جہاں میزبان ٹیم کو سیریز میں 0-1 کی برتری حاصل ہے اور وہ کامیابی حاصل کر کے سیریز اپنے نام کرنے کے لیے میدان میں اترے گی، جبکہ آسٹریلیا کی نظریں سیریز برابر کرنے پر مرکوز ہوں گی۔

پہلے ون ڈے میں پاکستان نے شاندار آل راونڈ کارکردگی کی بدولت کامیابی حاصل کی تھی، جس میں نوجوان اسپنر عرفات منہاس نے اپنے ڈیبیو میچ میں پانچ وکٹیں حاصل کر کے آسٹریلوی بیٹنگ لائن کو تہس نہس کر دیا تھا۔ راولپنڈی کی سست اور اسپن دوست وکٹ پر آسٹریلوی بیٹرز پاکستانی اسپنرز کے سامنے مشکلات کا شکار نظر آئے ۔

(جاری ہے)

دوسرے میچ کے لیے دونوں ٹیمیں لاہور پہنچ چکی ہیں جہاں قذافی اسٹیڈیم کی وکٹ روایتی طور پر بیٹنگ کے لیے سازگار سمجھی جاتی ہے۔

ماضی میں اس میدان پر کئی بڑے اسکور بن چکے ہیں اور امکان ظاہر کیا جا رہا ہے کہ اس بار بھی شائقین کو ہائی اسکورنگ مقابلہ دیکھنے کو ملے گا۔ پہلے میچ کی کامیابی کے بعد قومی ٹیم میں زیادہ تبدیلیوں کا امکان نہیں، تاہم اگر وکٹ مختلف نوعیت کی ہوئی تو نسیم شاہ کو پلیئنگ الیون میں شامل کیا جا سکتا ہے۔پاکستانی اسکواڈ میں بابر اعظم، سلمان آغا، شاہین شاہ آفریدی، حارث روف، ابرار احمد اور عرفات منہاس ایک بار پھر اہم کردار ادا کرنے کے لیے تیار ہیں۔

دوسری جانب آسٹریلوی ٹیم نوجوان کھلاڑیوں کو مواقع دے کر مستقبل کی مضبوط ٹیم تشکیل دینے کی کوشش کر رہی ہے، تاہم تجربہ کار بیٹر مارنس لبوشین اور کیمرون گرین کی فارم ٹیم انتظامیہ کے لیے تشویش کا باعث بنی ہوئی ہے۔آسٹریلوی ٹیم میں چند تبدیلیوں کا امکان ہے۔ آل راونڈر لیام اسکاٹ کو ڈیبیو کا موقع مل سکتا ہے جبکہ انجری کے باعث پہلے میچ سے باہر رہنے والے لیگ اسپنر ایڈم زمپا کی واپسی بھی متوقع ہے۔

اگر زمپا فٹ قرار پاتے ہیں تو وہ ٹیم کے اسپن اٹیک کو مزید مضبوط بنا سکتے ہیں۔ماہرین کے مطابق لاہور میں موسم خاصا گرم رہے گا اور درجہ حرارت 38 ڈگری سینٹی گریڈ تک پہنچ سکتا ہے، تاہم شام کے اوقات میں حالات نسبتا بہتر ہونے کی توقع ہے۔ قذافی اسٹیڈیم کے حالیہ ریکارڈ پر نظر ڈالیں تو یہاں بڑے اسکورز معمول بن چکے ہیں، جس کے باعث ایک اور دلچسپ اور سنسنی خیز مقابلے کی توقع کی جا رہی ہے۔پاکستان اگر یہ میچ جیتنے میں کامیاب ہو جاتا ہے تو وہ آسٹریلیا کے خلاف سیریز اپنے نام کر لے گا، جبکہ مہمان ٹیم کے لیے یہ مقابلہ سیریز میں واپسی کا آخری موقع ثابت ہو سکتا ہے۔